محمد هنيدي عن "تيك توك": أصبح مصدر جذب أكثر من السينما

أعاد الإعلامي محمود سعد، نشر تعليق للفنان محمد هنيدي على فيديو عن الاستخدام السلبي لمنصة "تيك توك" في الفترة الأخيرة.

وكتب هنيدي، في تعليق لـ فيديو محمود سعد عن “تيك توك”: "المشكلة مش الذوق العام ولا فكرة تدخل الدولة،
المشكلة أعمق بكتير، وهي إن نوع معين من المحتوى الشعبي، اللي فيه حوار شعبي، شوية شتيمة، شوية إيحاءات جنسية، بقى يعجب شرايح كبيرة جدًا من الناس، بصراحة، حتى إحنا ممكن نوقف ونفرج، كفضول؟".
 

مصدر جذب أكثر من السينما

وأضاف هنيدي: “الناس دي بقت مصدر جذب أكتر من السينما والتليفزيون، ومع كل لايك ومشاهدة، بيطلع ناس تانية تسيب شغلها وتقول: أنا كمان هعمل ده، في الأول بيبدأ لايف بسيط – ومع الوقت – ومع قلة الفلوس – الناس دي تبدأ تزود في الانحدار علشان تجيب مشاهدات، والكارثة؟ الجمهور موجود”.

واستكمل محمد هنيدي: “تيك توك بقت المنصة الأولى في الشرق الأوسط ومصر، لو نزلت مول البستان أو مول أركان، هتلاقي 70% من الناس عارفين التيكتوكر واحد واحد، بقى عندنا نجوم بيعملوا إعلانات، وبيتكرموا، وبيتصوروا في كل مهرجان، النتيجة العقل الجمعي للمجتمع بيتغير، الجيل الجديد بقى شايف إن ده هو الصح، وده هو النجاح، وناس كتير، رغم إنها مش قادرة تعمل زيه، لكن بتحس بإحباط”.

واختتم: “واحد بيشتم 12ساعة، والتاني بيشتم أهله وبيقول لفظ خارج ويكسب أكتر منه بـ 10مرات، أنا مش مع المنع، بس صعب ننفي إن في خلل كبير، خلل بيمس العقول، والوعي، وشكل المجتمع نفسه، التأثير حقيقي.. وخطر جداً على أجيال كاملة”.