ماجدة خير الله عن سرقة فكرة "الهوى سلطان": كلام فارغ

علقت الناقدة ماجدة خير الله، على أزمة فيلم "الهوى سلطان" التي بدأت باتهام المؤلفة رشا الجزار، لمؤلفة الفيلم "هبة يسري"، بسرقة فكرة الفيلم من قصتها التي كتبتها تحت عنوان "حبي الأول" عام 2017.

تعليق ماجدة خير الله

وقالت ماجدة خير الله لـ "تليجراف مصر": "الفيلم لو مكانش ناجح مكانتش هتعمل كده، في ناس بتستغل نجاح عمل علشان حد يروحلها والفيلم لو كان فاشل مكانتش جابت سيرة، إنما حكاية أصل في مشهد زي مشهدي ده كلام فارغ".

وتابعت “خير الله”: "لو ليها حق فعلًا تلجأ للطريق الشرعي في إنها تروح للنقابة تشتكي ويجيبوا سيناريو الفيلمين ويشوفوا مدى التشابه لان في لجنة مخصوص بحل القضايا اللي بالشكل ده".

وعن عدم رد هبة يسري على رشا الجزار بنفسها، قالت: "ليه واحد يتهمني بحاجة مش فيا أهتم إن أنا أرد عليه، هي رشا عايزة تسحبها بأي شكل علشان تبقى خناقة كبيرة، هي لو عندها إثبات تقدر تتجه للنقابة وتاخد الإجراءات القانونية، واللجنة في النقابة ناس محترمين لا هيجاملوا ده ولا هيجاملوا ده".

واستكملت: "ده في كتير من الأفلام عربي وأجنبي فيهم واحد خان مراته هل كده كل دول سارقين الفكرة من بعض؟ هو في أفكار كتير بتتشابه، السيناريست رشا عايزة تعمل ضجيج على عمل ناجح وتنسبه لنفسها، هبة يسري في خلال أعمالها السابقة رغم إنها مش كتير بس طريقتها وتفكيرها كويسة جدًا، فميصحش إننا نُسيئ لعمل شخص تاني".

أبطال فيلم الهوى سلطان

ويضم الفيلم نخبة كبيرة من النجوم منهم: منة شلبي، وأحمد داوود، وأحمد خالد صالح، وسوسن بدر، وعماد رشاد، وجيهان الشماشرجي، ومن تأليف وإخراج هبة يسري.

أحداث فيلم "الهوى سلطان"

فيلم "الهوى سلطان" عمل درامي اجتماعي خفيف يتناول قصة حب وعلاقات صداقة بين مجموعة من الأصدقاء، في قالب رومانسي كوميدي.

برومو الفيلم وحملة دعائية مميزة

ونشرت منة شلبي عبر حسابها الرسمي على "إنستجرام" في وقت سابق مقطعًا دعائيًا من الفيلم، معلقة عليه بقولها: "أصل التفاصيل أجمل بكتير بوجودك فيها".

كما أطلق صُناع الفيلم بوسترات دعائية عدة له، ظهر فيها نجوم العمل منة شلبي، أحمد داود، أحمد خالد صالح، وجيهان الشماشرجي.