بعد تصريح "البوسة مش عيب".. إعلامية لـ هادي الباجوري: كلامك مستفز

هاجمت الإعلامية والفنانة سارة نخلة، عبر برنامجها “آخر اليوم”، على قناة “هي”، تصريحات المخرج هادي الباجوري التي اعتبر فيها القبلة في الأفلام “مش عيب”، مؤكدة أن هذا الرأي يتجاوز القيم والمبادئ الراسخة في المجتمع.

وقالت سارة: “إزاي تستهين بالقيم والمبادئ اللي مجتمع كامل متربي عليها بالشكل ده؟ يعني حضرتك شايف إن تعليم ولادنا إن البوسة بين اتنين مش متجوزين حاجة عادية؟ الكلام ده مش مجرد رأي، ده اعتداء واضح على قيم وأخلاق مجتمعنا”.

وأضافت: “السينما النظيفة مش مجرد شعار فاضي، دي محاولة لتقديم فن يحترم مشاعر وأفكار الجمهور، ده كلام مستفز وتجاوز لكل الخطوط الحمراء، السؤال هنا: مين إداك الحق إنك تطلع تشكك في حاجة تمثل احترام لعاداتنا وتقاليدنا؟”

سارة ركزت في حديثها على أهمية التوازن بين حرية التعبير واحترام القيم المجتمعية، مشيرة إلى أن الفن وسيلة تأثير قوية، ويجب أن يكون رسالة هادفة. 

وتابعت: “كتير بيتكلموا عن حرية التعبير، بس الحرية دي عمرها ما كانت تبرير للإساءة أو الاستفزاز، لما تطلع تقول: ‘ليه نعلم أولادنا إن البوسة عيب؟’ أنت مش بتتكلم عن حرية الإبداع، أنت بتتكلم عن حرية هدم القيم”.

واختتمت حديثها بتوجيه رسالة مباشرة لهادي الباجوري قائلة: “يا أستاذ هادي، لو عندك مشكلة مع القيم اللي مجتمعك متربي عليها، مفيش حد أجبرك تلتزم بيها، لكن ما ينفعش تطلع تهاجمها بالشكل ده، اللي قلته مش رأي ولا إبداع، ده استهزاء واستخفاف بعاداتنا وتقاليدنا، وده شيء مرفوض تماما".