"أختي وصاحبتي".. أول رد من حورية فرغلي ومساعدتها على فيديو المشاجرة

علقت الفنانة حورية فرغلي، ومديرة أعمالها الإعلامية شيماء الشاعر على فيديو لهما تم تداوله بالأمس، يظهر مشادة كلامية بين الثنائي خلال مهرجان الإبداع الذي كُرمت خلاله الأولى.

حورية فرغلي

وقالت الفنانة حورية فرغلي لـ "تليجراف مصر": "كل اللي حصل إن الأستاذ محمد الغيطي قالي أنا لازم أمشي دلوقتي علشان عندي هوا فأنا سألته هنقعد قد إيه وهو قالي مش عارف لأني كان عندي تكريم".

أختي وصاحبتي

وعن مديرة أعمالها: "شيماء تبقي المسؤولة الإعلامية بتاعتي وصاحبتي وأختي قولتلها تعالي معايا برة علشان عايزة أحكيلك على حاجة وهي كانت كل شوية تمسك إيدي وتعلي صوتها بأنها مش فاهمة وإنها عايزة تعرف أنا عايزة أعمل إيه".

وتابعت فرغلي: "أنا قولتلها لما نطلع برة هقولك إنما هي كانت مصرة تعرف اللي بيحصل والناس ابتدت تاخد بالها إن هي بتسأل سؤال شخصي بصوت عالي، وأنا فهمتها بالراحة يا شيماء أول ما نطلع برة هحكيلك وأنا عليت صوتي علشان هي تسمع أنا بقول إيه لأن كان في دوشة، فهو ده اللي حصل لكن مكنش في خناقة ولا أي كلام من اللي اتقال ده خالص شيماء دي أختي وهي اللي ماسكة شغلي وأكتر حد بثق فيه، لكن مكنش قصدي خالص أكسفها أو أحرجها".

تعليق مديرة أعمال حورية فرغلي

بينما قالت شيماء الشاعر، مديرة أعمال فرغلي لـ "تليجراف مصر": "أنا كنت في القاعة بسرعلها التكريم لأني عارفة إن حورية مش بتحب تقعد في أماكن عامة فترة طويلة، وأنا كنت بكلم رئيس المهرجان علشان يسرع التكريم واتفاجئت إنها خرجت هي وأستاذ محمد الغيطي ومكنتش عارفة هي رايحة فين".

وأضافت الشاعر: "فأنا فضلت أسأل نفسي هل هي خرجت تكمل تصريحات برة أو تتصور مثلا أو خارجة خالص وأنا لما خرجت وراها بسألها قالتلي عندي هوا وده كان مصدر استغرابي اللي هو إزاي عندها هوا وأنا معرفش".

سوء تفاهم

وتابعت قائلة: "هي فعلا مكانتش فهماني ولا أنا فهماها وبسببه حصل سوء التفاهم ده وبعدها اتفاجئت إن كل المواقع منزلة الفيديو وكاتبين كلام ليس له أساس من الصحة، حورية دي صاحبتي وأختي".