والد سوزي الأردنية: "مش عارف هاجيب فلوس الغرامة منين"

أصدرت محكمة مستأنف المطرية، التى عقدت اليوم 12 يناير بمجمع محاكم العباسية، قرارها بقبول استئناف البلوجر سوزي الأردنية شكلاً، وذلك على حكم حبسها عامين بتهمة سب والدها بألفاظ خادشة للحياء العام، وقضت مجدداً بإلغاء الحبس، وتغريمها 300 ألف جنيه.

والد سوزي الأردنية لـ"تليجراف مصر"

وقال والد سوزي الأردنية لـ “تليجراف مصر”: أنا فرحان لبنتي والله، بس أنا هجيب 300 ألف منين، وكمان أحنا لسه دافعين 100 ألف جنيه كفالة، بس الحمد لله أن بنتي مش هتتحبس وهتقعد وسطينا.

وأضاف والد البلوجر سوزي الأردنية، أن الأسرة قررت عدم حضور جلسة النطق بالحكم في قضية اتهام ابنته بسبه عبر مواقع التواصل الاجتماعي.

وأوضح: “بنتي بحبها وبموت فيها، ومسامحها على كل حاجة، ومش عاوز أشوفها في مشكلة أبدًا طول ما أنا عايش، وبتمنى من ربنا أسمع خبر البراءة النهارده، والقضية دي تتقفل”.

وأضاف: "بنتي طيبة وتصرفاتها كلها تلقائية، وعمرها ما تقصد إنها تقلل مني أو تشتمني، أنا بحبها وبموت فيها، والبيت كله ما يقدرش يعيش من غيرها".

 سوزي الأردنية تشر صورة لعائلتها 

وكانت “سوزي” قد شاركت في وقت سابق صورة تجمعها بأسرتها، وكتبت: “يمكن يكون آخر يوم وآخر دقيقة وسطكم.. حياتي كلها وقفة على يوم وكام دقيقة وكلمة، يا أرجع معاكم يا هبقى في دنيا تانية، فعلًا أنا مش قد أي حاجة هتحصلي أو أتبهدل، أنا ست وصحتي وعمري ما هكون حمل إني أبقى وسط ناس تانية”.

وتابعت: “وفي الآخر هكون اتظلمت، لو رحت ورجعت تاني مش هبقى زي الأول خالص، مش هروح أتعاقب، هرجع أسوأ إنسانة في الدنيا، بقالي سنة وكام شهر منتظرة يوم واحد، مش طالبة حاجة من ربنا غير أنى أكون مع أهلي وأخواتي”.