كنزي مدبولي عن انتقادات "فرصة من ذهب": "ناس عايزة تقلل مني"

اشتهرت بـ"بنت خالة البنات" عبر منصات التواصل الاجتماعي، لتقديمها برامج بسيطة قائمة على التمثيل، إلى أن لعب ارتباطها عام 2017 دورًا محوريًا، ومنذ هذه اللحظة، باتت تقدم محتوى يتناول مشكلات المرتبطين، حتى ذاع صيتها، إنها البلوجر كنزي مدبولي التي طرحت أول أعمالها الأدبية “فرصة من ذهب” بمعرض القاهرة الدولي للكتاب 2024، وهي الرواية التي لاقت إقبالًا كبيرًا من الجمهور.

كنزي البالغة من العُمر 25 عامًا، التي نجحت في تأسيس قاعدة جماهيرية في السنوات الأخيرة، بفضل حضورها الدائم عبر منصات التواصل، حظي حفل توقيع روايتها بإقبال واسع من جانب متابعيها، بشكل لفت الأنظار داخل المعرض.

ورغم الحفاوة الواسعة التي شهدها حفل التوقيع، إلا أن عددًا من رواد مواقع التواصل انتقد البلوجر، بزعم عدم إلمامها بآليات الكتابة الأدبية، مع إرجاع الإقبال على شراء روايتها إلى حضورها على السوشيال ميديا فقط.

“ناس عايزة تقلل مني”

“دي ناس سامعة عني، وعايزة تقلل مني، وأنا متأكدة إنهم لو شافوا المحتوى اللي بقدمه هيحبوني”، بهذه الكلمات ردت كنزي على الانتقادات التي وجهها لها البعض، مؤكدة أنها تحترم كل الناس المنتقد لها قبل الداعم، على حد قولها.

رسالة للمنتقدين

البلوجر قالت لـ"تليجراف مصر"، “مش قادرة أصدق الإقبال اللي حصل في المعرض أثناء توقيع روايتي، دعم وحب في كل مكان، ورغم فرحتي بالناس بس كنت متوقعة إن هلاقي كلام غريب عليّ، معنديش مشكلة مع الانتقادات، بس مينفعش الإهانة”.

وتابعت كنزي، “ بالنسبة للناس اللي بتسأل أنا مين!، ده طبيعي إن فيه ناس متعرفنيش، والناس كلها على راسي، أنا بحترم الجميع، وأدعو الناس اللي متعرفش تدخل تشوف المحتوى اللي بقدمه وتعرف قبل ما تحكم”.

فكرة رواية “فرصة من دهب”

وأضافت “الرواية مش مرتبطة بحياتي الشخصية، بداية الفكرة كان في عام 2020، حينما طلب مني كتابة سيناريو في كلية الإعلام، وقتها حسيت إني عايزة أكتب فكرة حلوة، وكتبت فرصة من دهب، كانت 7 صفحات، وخدت درجتي، واتركنت في الدرج، ودعيت ربنا إني أكتب رواية بالفكرة دي وتطلع للنور.. واستجاب”.

أسباب الانسحاب من المعرض 

وأوضحت كنزي، “اللي حصل في المعرض ده حاجة ضايقتني وعيطت بسببها، عشان مكنتش عايزة أمشي وأسيب الناس، بس كان غصب عني، ووعدت بنات خالتي بحفلات توقيع الفترة القادمة خارج المعرض، ومش همشي لحد ما آخر شخص يمشي، ومحدش يزعل مني”.

“الناس أهم من الرواية”

وأكملت البلوجر، “شراء الرواية بالنسبة لي ميجيش حاجة جنب خاطر الناس وحبهم ليّ، وفرق معايا كل شخص جالي مخصوص عشان يشوفني، حب الناس رزق من ربنا، وربنا يعلم إن بحب كل الناس سواء اللي انتقدني أو اللي دعمني”.

الهجوم بداية النجاح

وختمت كنزي بالقول، "أنا بحب الكتابة من سن 18 سنة ودي نعمة ربنا أكرمني بيها، واتعلمت إن بداية أي حاجة هيكون عليها هجوم، ولو خدت فرصة التمثيل هيكون فيه هجوم مش الرواية بس، وعلى قد ما في كلام سلبي، بيكون فيه أضعافه كلام حلو، شوفت دعم كتير، وهحسن من نفسي وهطور من أسلوب كتاباتي الفترة الجاية".