الأجهزة الأمنية تفحص منشور "سيدة الببرونة" في ميكروباص شبرا

تسبب منشور كتبته سيدة تدعى “هبة الله” على حسابها الشخصي على موقع التواصل الاجتماعي “فيسبوك”، في إثارة حالة من القلق والجدل، لأن مضمون المنشور يتناول الحديث عن محاولة اختطاف طفل، فيما وصفته بأنه “أسوأ موقف مرت به في حياتها”.

في منشورها أشارت هبة الله، إلى تعرضها لمضايقة من سيدة أخرى حاولت اختطاف طفلها أثناء استقلالها سيارة ميكروباص من منطقة المؤسسة لنقلها إلى شبرا الخيمة بمحافظة القليوبية. كما نشرت صورًا للميكروباص والسيدة التي حاولت ارتكاب هذه الجريمة، حسب زعم صاحبة المنشور.

طلبت مني تاخد ابني

وقالت هبة في منشورها: “أنا النهاردا تعرضت لأسوأ موقف عدى عليّا في حياتي، كنت نازلة من عند ماما من طريق القناطر الخيرية، في عربيه المؤسسة - شبرا الخيمة الطريق الدائري، وركبت العربية بابني، وبعدها ست طلبت تاخد مني (تيّم) ابني، وأنا في الطبيعي أرفض المساعدة دي حتى لو معايا شنطة أو حاجة… ماحدش ياخد ابني مني، بصراحة مش بطمئن”.

الولد بيعيط ليه؟

وأكملت: "المهم ركبت وهي طلبت مني بإلحاح غريب أقعد جنبها وأرجع ورا، ومصممة أكتر من 5 مرات تقول لي تعالي هنا جنبي، وتشد مني الشنطة، وبتقول لي هاتي الولد، وأنا برضو أرفض.. أنا كنت ماسكة 2 تليفون في إيدي قالت لي بتطفل غريب شيلي الموبايلات في الشنطة، علشان لو وقعوا مش هتلاقيهم، ماردتش على كلامها، وفي نص الطريق اللي جنبي نزل من العربية، قامت هي بسرعة غريبة قعدت جنبي وفضلت تسألني ليه الولد بيعيط وماردتش عليها.

زجاجة مسك 

وتابعت، “بعدها سألت تاني قلت لها تعبان، هنا بقى أغرب رد فعل شوفته.. طلعت ببرونة من شنطتها وطلبت تاخده تشربه منها، طبعًا رفضت بشدة، بعد شوية طلعت من شنطتها عبوة إسبراي صغيرة وقالت لي بصي المسك دا من عند الرسول، زقيت إيديها بشنطتي جامد وقلت لها أنا عندي حساسية ومش بشم مسك”.

مياة 2 لتر ومناديل 

وأكملت هبة: “هي معاها إزازة مايه 2 لتر كبيرة جدا وبرضو أول مرة في حياتي أشوف حد ماسك مياه بالحجم دا، وماسكة كتلة مناديل فوقيها، طلبت مني أشرب وبتقول لي مخضوضة كدا ليه؟ قلت لها أنا مش مخضوضة ومش محتاجة مساعدتك ومن فضلك متتكلميش معايا، وهنا عليت صوتي وشخص ورا سمعني وسأل في حاجة؟، أنا كررت كل اللي هي قالته.. أنا في اللحظة دي كنت حاضنة ابني وبدعي من كل  قلبي إنه يحفظه لأني ماليش غيره، وفي الوقت دا طلعت تليفوني وصورتها”.

اختفاء السيدة 

وأضافت: "بعدها لما حكيت للشخص اللي ورايا، هي في لحظة نزلت من العربية، والغربية كان معاها شاب وواحدة تانية قدامنا مع كل كلامها معايا هي متكلمتش معاهم للحظة ولا باين إن كان معاها حد".

الأجهزة الأمنية

وتقوم الأجهزة الأمنية، بفحص المنشور المتداول، وتكثف جهودها لكشف ملابسات الواقعة، واتخاذ الإجراءات القانونية حيالها.