"بلاها دهب ونيش".. مبادرة شبابية لتخفيف أعباء الزواج

في ظل الأزمة الاقتصادية، وارتفاع أسعار المستلزمات المنزلية، دشن بعض الفتيات مبادرة تحت عنوان "بلاها دهب ونيش" لتخفيف أعباء الزواج.

وفي التفاصيل، طرحت إحدى الفتيات على موقع "إكس" سؤالًا، “بمناسبة الوضع الاقتصادي، إيه العادة المكلفة اللي تقدروا تلغوها في الجواز؟”، لتنهال عليها التعليقات التي تضمنت “الذهب” و“قاعات الأفراح”.

تعليقات الفتيات 

وكتبت إحدى الفتيات قائلة، "الدهب الأوفر، العفش المكلف، الفرح في قاعة آخر الدنيا عشان الناس تعرف قد إيه إحنا شيك، الفستان اللي بقت البنات حرفيا بتسابق بعض مين هتلبس فستان أغلى من التانية، ومعمول عند مين، في حين إن الفستان بيتأجر من أي أتيليه بربع التمن وبيكون أحلى مليون مرة". 

وانتقدت فتاة أخرى التكاليف الباهظة في شراء مستلزمات المنزل، قائلة، “الكاسات الكتير، وعشرين ألف طقم حلل، والفوط و الملايات الكتير أوي، والطقم الصيني، مش فاهمة ليه كل ده، والنيش”.

تعليقات الشباب 

لم تكن جميع التعليقات من جانب الفتيات فقط، بل شارك أيضًا غدد من الشباب الذين أيدوا مبادرة تخفيف أعباء الزواج والتكاليف الباهظة على الأفراح.

 وقال أحد الشباب، “مش نلغي، المفروض الطرفين يراعوا بعض، بس أنت معاك هات على قد ما تقدر ما تقصرش، يعنى هات دهب في المعقول لأنه يعتبر رأس مال ليك وليها ممكن نحتاجه بعدين، بالنسبه للعفش اعمل حاجه كويسة وما تأفورش، ماتطلبش من أهل البنت حاجة، اللي يقدروا عليه يجيبوه، وأهم حاجة ما نبصش لحد ونقلد دا دمر الكل”.

ورأى شاب آخر، ضرورة إلغاء الأفراح، والاكتفاء بالأساسيات في تجهيز عش الزوجية، وأن تكون شبكة العروس في المحدود.

وأيده شاب آخر قائلا، “الدهب والعفش والفرح المكلف وقايمة المنقولات الزوحية، مش محتاجين غير حاجة المطبخ والتليفزيون و5 ملايات و5 بطاطين و10 فوط دا اللي الظروف متسمحش معاه”.