"إنتو معقدين من البوس".. أبرز تصريحات إلهام شاهين في "رامز إيلون مصر"

وقعت النجمة إلهام شاهين ضحية الحلقة الـ 21 من برنامج رامز جلال 2025 “رامز إيلون مصر”، والذي يعرض يوميًا على قناة إم بي سي مصر بعد الإفطار مباشرة.

رامز جلال عن إلهام شاهين: اللي بيتقي شرها كل الفنانات والفنانين

وقدم رامز جلال ضحيته بطريقة ساخرة كعادته حيث قال عن الفنانة إلهام شاهين: “حلقة اللعب مع الكبار وأنا في الحلقات دي كأني بلعب بالنار.. إنتوا فاهمين يعني إيه تهزر مع أساطير الكار؟.. بصراحة كل سنة كنت بفكر أجيبها، وفي آخر لحظة برجع في القرار.. أصل دي لو حصلها حاجة هتخلي حياتي مرار.. لكن السنة دي مكنش قصادي اختيار".

وأضاف رامز جلال في مقدمة الحلقة 21 من “رامز إيلون مصر”: “عشان كده اتحديت نفسي وقلت في الآخر يعني هي مين؟ فنانة زي بقية الفنانين.. فيها إيه لما أبطحلها دماغها أو تخرج من عندنا إيديها مجبسين.. بنضحك معاكي عشان الناس تبقى مبسوطين.. معايا ومعاكم اللي بيتقي شرها كل الفنانات والفنانين.. اللي بنعمل حلقتها وإحنا مرعوبين.. إلهام شاهين".

إلهام شاهين عن البوس في الأفلام: إنتو معقدين من البوس

وتحدثت إلهام شاهين عن وجود حب جديد وعلاقة جديدة في حياتها: “ لسة بدور.. بس مفيش راجل يستاهل"، حيث سألها رامز جلال: “وهو في ست تستاهل”، وأجابته إلهام شاهين قائلة: "آه.. أنا ست استاهل".

وخلال فقرات حلقة اليوم من “رامز إيلون مصر” والتي كان ضيفها الفنانة إلهام شاهين، سأل رامز جلال إلهام قائلًا: “ليه بتهاجمي أي ممثلة بتقول إنها ضد البوس في الأفلام؟ لتجيب: ”انا مبهاجمش حد.. أنا بقول اللي مبتحترمش المهنة دي متشتغلهاش"، وعاد رامز ليسألها مرة أخرى: "إيه البوسة اللي اتباستيها في فيلم من الأفلام ومخيشة في دماغك"، لترد إلهام شاهين: “إنتو معقدين من البوس.. إيه التخلف دا.. مفيش حد يقدر يسأل ممثلة أجنبية مشهورة السؤال ده أصلا لأن ده شغل”.

سؤال حلقة برنامج رامز إيلون مصر اليوم

وطرح برنامج رامز إيلون مصر، سؤال الحلقة الـ 21 من البرنامج حيث جاء السؤال كالآتي: ما نوع الزهور التي كانت على ملابس إلهام شاهين؟.

وأتاح البرنامج للمشاهدين ثلاثة اختيارات بينها إجابة صحيحة على سؤال الحلقة وهو ما نوع الزهور التي كانت على ملابس إلهام شاهين؟، وجاءت الاختيارات كالآتي: (ورد - فل - عباد الشمس).

ويُعرض برنامج رامز إيلون مصر يوميًا خلال شهر رمضان، عقب الإفطار مباشرة، في تمام الساعة 6 مساءً بتوقيت مصر، والساعة 7 مساءً بتوقيت مكة المكرمة، وذلك عبر شاشة قناة MBC مصر ومنصة شاهد الرقمية.