السيسي عن الفن والإعلام: كانت صناعة وأصبحت تجارة.. ولا منع للأعمال

تحدث الرئيس عبدالفتاح السيسي عن دور الفن والإعلام فى تشكيل الشخصية المصرية والذوق العام، قائلًا: "فى الموضوع ده أنا قولت إنها عبارة عن مراجعة.. مراجعة لذاتنا كلنا، كان فيه واقع مختلف عن الواقع الموجود فيه.. كانت صناعة ودلوقتي بقت تجارة".

وأضاف الرئيس السيسي، خلال لقاء المرأة المصرية والأم المثالية: "كان في أهداف حطها ناس من الجامعات والمسؤولين اللى فاهمين يعني ايه إعلام ويعني إيه علم نفس وعلم اجتماع ويعني إيه مجتمع وصياغته.. وبالتالي كان ينفق عليه".

الإعلام من الصناعة للتجارة

وتابع: "لما دخلنا فى تطورات خلال 30 والـ 40 سنة اللى فاتوا وبقي تليفزيون الدولة محمل بأعباء مش قادر يقوم بالدور ده فتحول الموضوع من صناعة إلى تجارة ومع الوضع فى الاعتبار أنه ممكن يحصل تربح وتحقيق أرباح لو بقي العمل جيد أنا خايف على الذوق العام بتاعنا كمصريين.

وواصل: "الموضوعات اللى بنتكلم فيها دي وقولت كده وبكرره الإعلام له تأثير كبير أوي والمسجد والكنيسة لهما تأثير كبير والمدرسة والأسرة والحقيقة أن الـ 4 عناصر متداخلين بشكل كبير اوي ويأثروا فى بعض، لو تشددنا فى الجامع والكنيسة ينعكس على المجتمع ولو تطرفنا فى الفن والإعلام ينعكس على المجتمع وإذا كان التعليم فى المدارس ليس جيد ينعكس على المجتمع وندخل فى دائرة مفرغة يكون لها تأثير كبير على المجتمع لفترة طويلة".

وأكمل الرئيس السيسي: إذا كانت بتتكلف 20 – 30 مليار جنيه فإن تأثيرها على مجتمعاتنا يتعدي أرقام كبيرة أوي، حجم الدعم المقدم من الدولة لأبناء مصر ودي بلدنا والأرقام أكبر من عشرات المرات، وده مش معناه المنع لكن بقول في صياغة وتنظيم وده عبارة عن بنشاور للناس خلي بالكم، كان فيه الأول فيه توازن وفيه خلل كبير دلوقتي، ودي مش وجهة نظر فوقية أو أحادية انا نقلت وجهة نظركم وبيجيلي قياسات رأي ودراسات فى الموضوع كلها تحدثت عن أن الموضوع واخد اتجاه تصاعدي ومحتاجين نراجع نفسنا فيه.