السيسي: خططنا لإضافة 60 ألف حضانة في المدارس الابتدائية

تحدث الرئيس عبد الفتاح السيسي عن تطوير منظومة الحضانات في مصر قائلًا: “لما جينا نتكلم فى موضوع الحضانات من 3 - 4 سنوات كان العدد الموجود أقل من كده بكتير ولازم نعترف إن النمو السكاني بتاعنا مش بيخلينا نقدم أفضل خدمة فى أي مجال من المجالات سواء تعليم أو صحة بما فيها الحضانات”.

وأضاف الرئيس السيسي، خلال لقاء المرأة المصرية والأم المثالية: "قولنا ساعتها نقلل من حاجتين الشروط المطلوبة للحضانات بما إن مفيش خالص أو عندي حاجة كويسة وقولنا يبقي عندنا حاجات ممكن تتطور بعد كده من خلال الإشراف والتعامل بتاعها".

وتابع: عندنا أكثر من 50 ألف مدرسة وقولنا لو حطينا فى كل مدرسة فصل أو 2 هيكون عندنا من 50 -60 ألف حضانة وده اللى اشتغلنا عليه من حوالي 4 سنوات وأتمني أن لو فيه أفكار أخرى نشتغل عليها.

أزمة الفن والدراما

كما تحدث الرئيس عبدالفتاح السيسي عن دور الفن والإعلام فى تشكيل الشخصية المصرية والذوق العام، قائلًا: "فى الموضوع ده أنا قولت إنها عبارة عن مراجعة.. مراجعة لذاتنا كلنا، كان فيه واقع مختلف عن الواقع الموجود فيه.. كانت صناعة ودلوقتي بقت تجارة".

وأضاف الرئيس السيسي: "كان في أهداف حطها ناس من الجامعات والمسؤولين اللى فاهمين يعني ايه إعلام ويعني إيه علم نفس وعلم اجتماع ويعني إيه مجتمع وصياغته.. وبالتالي كان ينفق عليه".

وتابع: "لما دخلنا فى تطورات خلال 30 والـ 40 سنة اللى فاتوا وبقي تليفزيون الدولة محمل بأعباء مش قادر يقوم بالدور ده فتحول الموضوع من صناعة إلى تجارة ومع الوضع فى الاعتبار أنه ممكن يحصل تربح وتحقيق أرباح لو بقي العمل جيد أنا خايف على الذوق العام بتاعنا كمصريين.