دفاع المتهم بالتعدي على سائق كمبوند الفردوس يروي تفاصيل "اتصال الزوجة"

كشف حسن يوسف، دفاع المتهم بالاعتداء على سائق حافلة تلاميذ المدارس في كمبوند الفردوس بمحافظة الجيزة، تفاصيل جديدة في القضية.

تفاصيل مشاجرة الفردوس 

وقال حسن يوسف في تصريحات خاصة لـ"تليجراف مصر": "المتهم كان بيخدم الوطن لسنوات عديدة، وحاليًا على المعاش وسنه لا يسمح أبدًا بأنه يفضل محبوس المدة دي، كمان موكلي إية يخليه ينزل من بيته يكسر عربية واحد الساعة 7:00 الصبح".

وتابع دفاع المتهم: "موكلي جاله تليفون من زوجته بأن فيه واحد شتمها ودمر عربيتها، أي راجل مننا هيسمع الجملة دي هيجري يشوف زوجته حصل لها إيه.. ولمّا راح بيكلمه شتمه فالأهالي اتعاملت معاه لما شافوه غلط وكل الناس في صف موكلي".

أقوال المجني عليه بمشاجرة الفردوس 

وكان  المجني عليه بواقعة مشاجرة كمبوند الفردوس قد أدلى بأقواله أمام جهات التحقيق المختصة، كاشفًا تفاصيل الواقعة بداية من حادث الاصطدام بسيارته حتى الوصول لقسم الشرطة.

وسأل رجال جهات التحقيق المجني عليه بواقعة مشاجرة كمبوند الفردوس عما حدث معه بالتفصيل، وأجاب: “اللي حصل إن أنا شغال على عربيتي شيفروليه فان بوصل مدرسة مش فاكر اسمها، بس يجيب الأطفال من كذا منطقة وكان آخر منطقة بنسبالي المفروض هروح أجيب منها الأطفال للمدرسة كانت هي الفردوس، وروحت فعلا وجبت الأطفال بتوع الفردوس فعلا جزء منهم وجزء كنت لسة بكمله”.

وأكد المجني عليه أقواله وقال: “وبعدين وأنا ماشي في شارع في الفردوس عند مدرسة الشهيد إيهاب مرسي كان في تقاطع، وأنا كنت ماشي في طريقي عادي عشان مكمل على طول في التقاطع، وأول لما طلعت العربية من الشارع لسة بعدي الطريق خلاص لقيت الست اللي هي معايا في المحضر جاية بسرعة و خبطتني بالعربية بتاعتها من وهي جاية على شمالي خبطت العربية عندي من الجنب من قدام”.

وأضاف المجني عليه: “نزلت من العربية وهي نزلت لقيتها قعدت تزعق وشتمتني بس مش فاكر هي قالت إيه بس قلت لها أنا مش هتكلم معاكي، وفضلت واقف مستني نحل أو تشوف حد هييجي ولا إيه، لقيتها راحت مطلعة التليفون بتاعها وعملت مكالمة لقيت جوزها جالي ومعاه اثنين رجالة دول اللي شوفتهم جم بعدين”.

وأكمل حديثه: “الراجل الكبير جه وقالي إيه اللي حصل قلت له أنا ماشي في طريقي هي جاية بسرعة خبطتني من الجنب من قدام، راح قالي إزاي خبطتك قالي أنت غلطان قلت له أنا غلطان إزاي هي اللي خبطني من الجنب من قدام لما قلت له كده قعد يزعق ويشتم بس مش فاكر بالظبط قالي إيه الألفاظ، بعد كده في نص ما هو بيكلم لقيت واحد من عياله دخل قالي هات الرخص والبطاقة بتاعتك قلت له أنا مش هديك حاجة أنا هديها للقسم مش هديهالك أنت، راح ماسك فيا وضربني وابنه الثاني معاه راح ضاربني برضو من ورا كده على دماغي”.