ننشر نص التحقيقات مع فرد أمن بواقعة خطف نجل إعلامي شهير بالشيخ زايد

استمعت نيابة الشيخ زايد إلى شهادة أحد أفراد الأمن في الفيلا الواقعة في الكومبوند الذي شهد حادثة اختطاف وتعذيب نجل إعلامي معروف، حيث تم تصويره أثناء الاعتداء عليه من قبل فتاة وشقيقها وآخرين.

وحصلت "تليجراف مصر" على نص التحقيقات مع فرد الأمن بالقضية التي حملت رقم 1139 لسنة 2025 جنح أول الشيخ زايد.

وجاء نص التحقيقات كالتالي:

س: ما اسمك وسنك وعنوانك وعملك؟

ج: اسمي محمد جمعة جمعة، 48 سنة، مقيم قرية برقاش بمنشأة القناطر وأعمل فرد أمن بكمبوند رويال سيتي.

س: ما صلتك بالواقعة محل التحقيق؟

ج: أنا شغال فرد أمن في الكمبوند بقالي 7 شهور وشغلي من السبت للخميس وشغلي من الساعة 7 مساءً للساعة 7 صباحًا، وفي رمضان الشغل عشان الفطار بيبقى من الساعة 8 بالليل للساعة 8 الصبح وجاي النهاردة بناء على طلب النيابة عشان أشهد باللي شوفته.

س: ما معلوماتك بشأن الواقعة محل التحقيق؟

ج: "اللي حصل أن أنا كنت واقف فرد أمن عند النادي وعلى طول بشوف يوسف بالعربية "الجيب رانجلر" هو وصاحبه وبيجوا كل يوم يقفوا بالليل عند النادي والنادي بيقفل الساعة 10 وهما بيجوا يقفوا دايما مع بنات هناك بالليل في الجراج وشويه يلفوا بالعربية وشوية يقفوا بالعربية وهما بيلفوا بالعربية بيجروا جامد في الكمبوند".

وأكمل فرد الأمن، "يوم الواقعة هما بردوا زي كل يوم بيجوا يقفوا شوية ويلفوا شوية، وعلى الساعة حوالي 12 بالليل وقفوا وكانوا عربيتين، عربية فيها يوسف وصاحبه مروان وجات عربية بنات وقفت جمبهم كان فيها حوالي 6 أو 7 بنات وهما واقفين بيضحكوا ويهزروا وبعدها بحوالي 10 دقايق لقيت عربية ملاكي واحدة بس جاية بسرعة ووقفت عندهم ونزل منها شخصين أنا أول مرة أشوفهم واحد راح على يوسف وفتح الباب عليه وقاله (انزل يلا) يوسف رد عليه وقاله ( ليه يا فندم أنا عملت إيه؟) رد عليه (انزل دلوقتي وأنت تعرف)".

وتابع فرد الأمن، “بعد كده نزلوه من باب العربية وشدوه من دراعه وهو بينزل ووقعوه على الأرض وبعدها ضربوه كذا ضربة في وشه بالبوكس وبعدها قوموه (وواحد منهم قال له يلا معايا دلوقتي تعرف) ورد عليه يوسف (طب فين با فندم) قال له (هتعرف دلوقتي) وراح لوى دراعه ولف بيه الناحية الثانية للعربية عشان يركبه وبعد كده راح بسرعة على كرسي السواق للجيب رانجلر وشغل العربية واتحرك”.

واستكمل: "ومروان اللي كان جنب يوسف نزل عليه الشخص الثاني اللي كان راكب في العربية اللي جات ولونها أحمر وضربه بالكف على وشه، والمتهم خد العربية التي كانوا جايين بيها، والعربيتين اتحركوا ورا بعض على طول بسرعة".

وأضاف: "أنا واخد تعليمات اني أي مالك مكلموش حتى لو اتنين ملاك مليش دعوة أنا ببلغ الإدارة والمشرف بتاعي وبس وهما بيتصرفوا والبنات في الوقت ده كانوا بيصوتوا وأنا حاولت أسلك مرة واحدة بس الجاكيت بتاعي اتقطع فخفت وبعدت وده كل اللي شوفته وأعرفه".

س: متى وأين حدث ذلك؟

ج: “الكلام ده حصل الخميس صابح الجمعة 2025/3/14 الساعة 12:15 صباحًا، وكان بره نادي بكمبوند رويال سيتي الشيخ زايد”.

س: ما سبب ومناسبة تواجدك بالمكان والزمان سالفي الذكر؟

ج: "عشان أنا شغلي هناك فرد أمن وأنا من ساعة ما اشتغلت في الكمبوند وأنا ماسك المنطقة دي حراسة ودايما شعلي بيبقي بالليل".

س: وما هي بيانات تلك السيارة التي كان يستقلها الشخصان القادمان مثلما ذكرت؟

ج: هي عريبة واطية على الأرض ولونها محمر ومعرفش أرقامها.

س: من الذي أبصرته تحديدًا لأول وهلة عند وصول تلك السيارة آنفة البيان؟

ج: لقيت عربية ملاكي واحدة بس جاية بسرعة ووقفت عندهم ونزل منها شخصين أنا أول مرة أشوفهم واحد راح فتح الباب عليه.

س: وهل أبصرت ثمة أسلحة أو أدوات بحوزتهم آنذاك؟

جـ: لا أنا ما شفتش غير الطفاية بس بتاعة العربية وكانت مع الشخص اللي كان جنب السواق في العربية اللي جت.
س: هل قام ذلك الشخص الذي كان بحوزته الطفاية بالاعتداء على أحد بها؟

ج: لا مضربش حد بيها.

س: وما الذي قمت به أنت عقب رؤيتك لهذا المشهد بأكمله؟

ج: أنا حاولت أسلك مرة واحدة بس الجاكيت بتاعي اتقطع فخفت وبعدت ورحت اتصلت على المشرف بتاعي، وبلغته بالوضع كله وبعد كده هو جالي وراح طلع وراهم بالموتوسيكل يشوف إيه الموضوع.

س : هل من ثمة علاقة أو خلافات فيما بينك وبين أطراف الواقعة من قبل؟

جـ : لا مفيش أي حاجة ولا أعرفهم بس يوسف ومروان أنا بشوفهم كل يوم لما بيجوا يقفوا في الكمبوند على طول بالعربية الجيب الزيتي وأنا كنت أول مرة أعرف أسماءهم.

س : وما قولك فيما قرره المجني عليه بتحقيقات النيابة العامة ؟

ج : لا محصلش مكنش فيه 3 عربيات ولا أشخاص كتير ولا في عصيان ولا أسلحة بيضاء واللي شفته ذي ما قلت في التحقيقات.

س: هل لديك أقوال أخرى؟

ج: لا.

وفى نهاية التحقيقات قررت النيابة صرف فرد الأمن من سراي النيابة.

كما أمرت النيابة العامة بإخلاء سبيل الفتاة “خديجة م ح”، و"محمد س ي"، من سراي النيابة بينما أمرت بإخلاء سبيل شقيقها “آدم م ح”، بكفالة 5 آلاف جنيه من ديوان القسم لبيان وجود قضايا أخرى ضده من عدمه.