والد ضحية حادث سيرك طنطا: كان ممكن ينقذوا ابني بس خافوا على النمر

كشف إبراهيم البسطويسي، والد ضحية سيرك طنطا، تفاصيل وكواليس جديدة عن حادث السيرك، بعد تصريحات شقيق أنوسة كوتة مدربة الأسود، بأن الضحية السبب في الواقعة.

تفاصيل حادث سيرك طنطا 

وقال والد ضحية سيرك طنطا، في تصريحات لـ “تليجراف مصر”، : “شقيق أنوسة كذاب عشان ابني مدرب أسود من 11 سنة ليه فيديوهات وهو بيدربهم، وابني اتعلم ترويض الأسود من بيت الحلو ولو كان جوه القفص كان عرف يروضهم ويسيطر عليهم”.

وأضاف: “الغلط والعيب من أنوسة كوتة عشان هي اللي معرفتش تسيطر على النمر كويس وكانت السبب في اللي حصل لابني، وبعدين كل أسد أو نمر موجود جو القفص ليه مدرب خاص بيه وبيبقى مربوط كويس علشان ميأذيش المدرب بتاعه”.

وأكمل: “ابني مد إيده عشان يربط النمر، والمفروض المدرب رابط النمر كويس جدا ويكون واخد حذره، ولكن ده محصلش عشان ابني كان فاكر مدرب النمر رابطهم كويس بس المدرب الخاص بالنمر كان مسيب الحبل شوية عشان كده كل دراع ابني”.

وأشار: “كان ممكن ينقذوا ابني من النمر عشان هما بيبقى معاهم سلاح خرطوش بيستخدموه الطوارئ، وأنوسة استخسرت تقتل النمر بطلقة من اللي معاهم وتنقذ ابني عشان النمر ثمنه مليون جنيه، ولو حد شاف الأسود اللي في الغابة والأسود اللي في السرك، هيلاحظ إن الأسود بتاعت السرك جسمها ضعيف وجعانة”.

وأنهي حديثه: “الواحد لما بيبقى عنده حيوان أو كلب، بيعرف إنه جعان لما بيشوف شكله وبطنه لو خاسين ويبقى محتاج أكل، وأنوسة كذبت لما قالت إنها خدت ابني المستشفى عشان اللي راح بابني المستشفى ناس غريبة وخدوه في عربية نص نقل، والنمر مهجمش اللي في القفص عشان كان في إيدهم الكرباج مش عشان هو مش بيعرف يدرب ويروض الأسود”.

وفي وقت سابق، خرج شقيق مدربة الأسود وأرملة الملحن محمد رحيم، أنوسة كوتة، ليدافع عنها بعد الاتهامات الموجهة إليها بعد بتر ذراع مساعدها، إثر تعرضه لهجوم من النمر في سيرك طنطا.

دفاع شقيق أنوسة كوتة

ونشرت أنوسة كوتة، فيديو لشقيقها وهو يدافع عنها عبر صفحتها على فيسبوك، اتهم فيه عامل السيرك المصاب، محمد إبراهيم عبدالفتاح بسطاويسي، بالإهمال ومحاولة التباهي أمام أصدقائه التي كادت أن تفقده حياته، كون توثيق وربط الحيوانات ليس من مهام وظيفته.

وقال شقيق أنوسة: ”مبروك الترند يا بسطاويسي، كنت هتضيع المدربة والجمهور كله بسبب أنك بتتمنظر، مبسوط، وبعدين بتقول إن الحيوانات دي مكلتش من 10 رمضان، يعني من 25 يوم، يعني الأولى يأكلوا إيدك إنت اللي برا القفص ولا المدربة نفسها اللي جوه القفص ومقفول عليها؟، أنت جاي تتمنظر قدام صحابك على حيوانات متعرفكش! مستني منهم إيه".