فتنة زيزو تقسم جمهور الكرة: "بنحبك.. يا ناكر الجميل"

رد لاعب الزمالك أحمد السيد “زيزو”، على شائعات انتقاله إلى النادي لأهلي أو انتقاله لأي نادٍ آخر، عبر حسابه الرسمي على موقع “فيسبوك”.

وجاء في نص بيان زيزو: “الحمد لله، أنا راجل بحترم كل الناس، لكن للأسف عدم ردي على المعلومات المغلوطة، والتزامي الصمت زاد عن حده.. كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور بسبب خبر رايح وخبر جاي”.

وأضاف: “بكل وضوح أنا لم أوقع لأي نادٍ سواء داخل أو خارج مصر.. اللي حصل على توقيعي يتفضل يعلن.. إذا كان كلامه صحيح.. كمان اللي عنده دليل على توقيعي لأي نادٍ برضو يتفضل يطلعه على الملأ”.

وجاءت ردود فعل جماهير الكرة المصرية بشكل عام وجماهير الزمالك بشكل خاص قوية، إذ هاجمه البعض في حين دعمه آخرون.

ردود فعل الجماهير على بيان زيزو 

قال أحد الجماهير:" المهم هتلبس رقم إيه عندنا"، بينما قال آخر: يا ناكر الجميل"، وقال ثالث: "بنحبك يا زيزو وأنت مش بياع.

فيما قال أحد المعلقين: “مش مسامحينك يا زيزو وربنا ما يوفقك هناك بحق كل كسرة قلب مشجع زملكاوي كان بيهتف لك في المدرج والناس اللي كانت بتدعمك وعملت منك لاعب دولي وأسطورة والناحية الثانية كان بيتقال عليك بالونة ولاعب فاضي وآخرك تلعب باك حسبي الله ونعم الوكيل بحق وجع قلوب الناس اللي زعلت عليك والناس اللي كانت واثقه فيك وإنت خذلتها”.

وتابع: “بصيت لشويه فلوس زيادة ومبصيتش للنادي اللي عمل منك لاعب وشهرك وخيره عليك هو وجماهيره وخلوك أحسن لاعب في مصر وأفريقيا مبصيتش للملايين اللي لما كان أي حد بينتقدك أو بيغلط فيك بتبقى أول ناس في ضهرك وتدافع عنك ولمّا كان مستواك بيبقى وحش ومش شايف في الملعب كنا بنقول رصيدك يسمح وبنتغاضى عن أي حاجه لأنك اتحطيت في خانه الأسطورة”.

واختتم تعليقه بقوله: “إنت لاعب مادي درجه أولى وخاين للعشرة، وأنا كمشجع زملكاوي أعلن اعتزال التشجيع”.