عمر زهران: "خالد يوسف وشاليمار هددوني بالانتقام"

حفظت جهات التحقيق المختصة بالجيزة، أمس، التحقيقات في البلاغ المقدم من الفنانة شاليمار شربتلي، ضد المخرج عمر زهران، والذي اتهمته فيه بـ"خيانة الأمانة" بعد احتفاظه بإيصال أمانة بقيمة 12 مليون جنيه، دون تسليمه إليها كما تعهد سابقًا، بحسب أقوالها.
 

اعترافات المخرج عمر زهران بقضية الفنانة شاليمار شربتلي 
 

وحصلت “تليجراف مصر”، على نص التحقيقات في قضية المخرج عمر زهران وشاليمار شربتلي، وجاءت كالتالي:

س: ما قولك فيما هو منسوب إليك من أنك متهم بخيانة ائتمان المدعو خالد يوسف لتسليمك إيصال الأمانة -محل التحقيقات، وعند مطالبتك به امتنعت عن تسليمه إليه بأن قررت له بضياعه ثم قيام مدافعيك بتقديم ذلك الإيصال في أثناء جلسات محاكمتك بالقضية رقم 7439 لسنة 2023 جنح قسم الجيزة؟

ج: الكلام ده محصلش.

س: ما علاقتك بكلا من خالد يوسف حلمى محمد، وشاليمار حسن عباس شربتلي؟

ج: أنا صديق خالد يوسف وصديق لشاليمار حسن شربتلي

س: ومنذ متى نشأت تلك العلاقة؟

ج: أنا صديق خالد يوسف من حوالى 25 سنة وصديق لشاليمار من حوالي 15 سنة.

س: وما مناسبة نشأتها؟

ج: بمناسبة العمل عشان هو مخرج تلفزيوني وأنا كنت مخرج في قنوات إيه آر تى.

س: وما تطورها؟

ج: إحنا كانت علاقتنا كويسة جدا ما بينا وبين بعض ومفيش أي مشاكل

س: وما مدى وجود خلافات فيما بينك وبين سالفي الذكر؟

ج: هو مكنش في أي خلاف لغاية إجازة الصيف اللي فات وكنا في الساحل وكنا جروب ومعانا في الجروب الفنانة هالة صدقي وهالة سرحان المذيعة، وشاليمار كان مفقود منها مجوهرات من حوالي سنة ونص قبلها، ووقتها هالة صدقي بلغتني إن عندها صديقة لها اسمها عفاف، قالتلها إنها تعرف واحدة قالتلها إنها شافت مجوهرات في شقة مفروشة بتاعة خالد يوسف في الزمالك بيقابل فيها الست دي، ولما هالة بلغتني الموضوع دة بعد كدة شاليمار وخالد عرفوا إن هالة قالت إن في مجوهرات في شقة خالد يوسف وإني عرفت الموضوع، وعلشان كدة خالد يوسف افتكرني واقف مع هالة وبقول كلام زى دة عليه، ومبلغتهمش وقتها باللى هالة قالتهولي، وحصلت الخلافات بينا وعلى أساسها راحوا قالوا إن أنا سرقت مجوهرات شاليمار وبعدها جايين يقولوا إن أنا أخدت منهم وصل الأمانة وأخفيته عنهم.

س: وما سبب الخلاف بينكما؟

ج: هو الموضوع إن خالد وشاليمار لما عرفو إن في كلام على المجوهرات اللي في شقة خالد يوسف اللي في الزمالك افتكروا إن أنا عرفت ومرضتش أقولهم.

س: وما مدى تطور ذلك؟

ج: الخلاف اتطور بينا لدرجة إن شاليمار وخالد عاتبوني وواجهوني إزاي أنا مبلغتهمش بالموضوع دة وأنا ساعتها قلتلهم إن الموضوع لو اتكرر تاني وعرفت حاجة، برضو مش هروح أقولها.. فزاد الخلاف بينا.

س: وعلى ما انتهى ذلك الخلاف بينكم؟

ج: توعدوني بالانتقام وقاموا باتهامي في محضر سرقة مجوهرات شاليمار واللي أنا محبوس على ذمتها دلوقتي.