فتاة تتهم سائقا بالاعتداء عليها وخطفها في أكتوبر.. والداخلية تفحص المنشور

تفحص أجهزة الأمن بوزارة الداخلية منشورا لفتاة تدعى" نادين السحرتي" مفاده تعرضها للضرب ومحاولة خطفها على يد سائق ميكروباص بمنطقة أكتوبر.

فتاة تدعي تعدي سائق عليها وخطفها بأكتوبر

وقالت إنها أستقلت سيارة ميكروباص لتوصيلها لعملها فقام السائق بزيادة الأجرة لـ 15 جنيها فنشبت معه مشادة كلامية فاتصلت بزميلها وطلبت منه التوقف بالموقف لكنه رفض وأغلق الشبابيك والباب ونزل من السيارة وقام بضربها وتمزيق ملابسها والطرحة.

وجاء فى المنشور الذى  نشرته الفتاة عبر صفحتها الشخصية على “فيسبوك”: “مش عارفه أقول إيه ولا أبتدي إزاي بس اللي حصلي النهارده غير طبيعي بالمرة أنا اتضربت واتشتمت واتبهدلت في الشارع وكان عايز يخطفني وقالهالي باللفظ كده إنه هيعمل فيا كذا وكذا”.

وأضافت الفتاة: “كنت نازلة من بيتي عادي ركبت ميكروباص أكتوبر عشان أروح شغلي يوم الجمعة الساعة 4:30 العصر، المهم مكنش في مواصلات عشان الزحمة، وكده جه ميكروباص وحمل والناس طلعت أنا وكام حد وكان في أسرة نصها ركب والنص التاني هو طلع يجرى بيهم الناس فضلت تزعق إنت عملت كده إزاى قال الأجرة 15جنيها الناس قالوا ماشي وكان طالع بينا بوابات فأنا اعترضت لأني متأخرة على شغلي قولت أنا هدفع في الموقف عشان أقول لأمين الشرطة اللي حصل من السواق وقلة الإدب دي كلها”.

ضربها وأسقط لها الُخمار

وتابعت فى المنشور: "كلمت حد من زمايلي وحكيتله اللي حصل وإني شديت أنا والسواق وإنه يجب أمين الشرطة ويقف يستناني عشان كان في حاجة غريبة فالسواق مكنش طبيعي، وأول ما وصلنا والناس نزلت أنا فضلت قعدة عشان أمين الشرطة كان داخل علينا طلع يجري بيا بالعربية وكان عمال ياكل مطبات أنا عيشت في رعب مش طبيعي، قام ركن ونزل عند سيتي سكيب وفتح الباب وضربني وقطعلي الخمار بتاعي 100 حتة وبالأقلام.

فضلت أعيط وأصرخ وبقوله حرام عليك إنت ليه عملت كده

واستكملت: “كان معايا شغل عبارة عن إزاز كسرتله الإزاز بتاع العربية بيه وفضلت أصوت وأصرخ وهو قفل شبابيك العربية كلها عشان محدش يسمعني قام بعد ما ضربني مسك موبايلي رماه في الشارع وقالي يابنت..... انزلي هاتيه بقي من الشارع وقفل الباب أنا معرفتش أنزل عشان هدومي متقطعه وشعرى باين وفضلت أعيط وأصرخ وبقوله حرام عليك إنت ليه عملت كده قام أخدني وطلع بيا ع العاشر المكان ده في أكتوبر وكان بيهرب من الناس اللي شافوه وأنا بصوت قولتله نزلني قالي مش هنزلك ده أنا هوديكي لأصحابي هيعموا فيكي”.

رمت نفسها والسيارة على أقصى سرعة

وأضافت: “خوفت قولتله نزلني قالي انزلي من العربية وهيا ماشية ومن الخوف نطيت منها مش هقف هو مكنش عايز يقف عشان ميتمسكش، وفتحت باب العربية وهي ماشية على أقصي سرعة ونطيت منها وشعري وجسمي باين من تقطيع الهدوم وطلع يجرى في ناس جابوه وفضلوا يضربو في لما وشه جاب دم”.