والدة الطفل المخطوف في توك توك: "ده أبوه.. والفيديو من 3 شهور"

شهدت منطقة الوراق واقعة مؤسفة أثارت الرعب في نفوس الأهالي بعدما انتشر فيديو لخطف طفل داخل توك توك من يد والدته.

محاولة اختطاف طفل 

وقالت والدة الطفل المخطوف إن “المتهم هو زوجها والد الطفل، والواقعة منذ 3 شهور ولا أعرف من نشر الفيديو  على الإنترنت”.

كسر لي إيدي

وأضافت والدة الطفل في تصريح خاص لـ"تليجراف مصر“: "كنت مودية عيالي الحضانة في شارع 10 في الوراق وتفاجأت بجوزي بيخطف ابني جوة توك توك ولما لحقته في التوك توك مسكني ضربني وكسر إيدى واتعورت في جسمي كله”.

وتابعت "توجهت لقسم شرطة الوراق وعملتله محضر وقولت للحكومة لو عاوز يشوف عياله يجي يشوفهم".

وأكملت والدة الطفل “ابني جاتله صدمة نفسية وخايف ينزل الشارع من ساعتها، وأبوه مبيسألش عليهم أصلا ولو عاوز يشوفهم في طريقة أحسن من كدة ييجي يشوفهم بيها”.

وواصلت السيدة “مبيصرفش على عياله ولا يعرف عنهم حاجة ورافعة عليه قضية خلع وعملتله محضر خطف ساعتها،  وأخدت حكم حبس عليه”.

وعن نشر الفيديو قالت “كنت في الشغل ولقيت صحباتي اتصلوا بيا وقالولى بقيتي ترند ومكنتش فاهمة غير لما بعتولي الفيديو”.