شيكابالا يكشف أسرار توقيعه للأهلي: "رحت 5 مرات ومحدش قابلني"

كشف محمود عبدالرازق شيكابالا، قائد نادي الزمالك، عن كواليس عودته من الاحتراف في اليونان، مؤكدًا أنه كاد ينتقل إلى الأهلي، لولا تدخل مسؤولي القلعة البيضاء في اللحظات الأخيرة.

 رحت الأهلي..وتليفون رجعني

وقال شيكابالا خلال ظهوره في بودكاست "ذا ميكر":"بعد رجوعي من اليونان، الأهلي كان بيتواصل معايا يوميًا، والزمالك ماكنش بيرد ولا بيردّ على تليفوني. رُحت لهم خمس مرات، وماحدش قابلني."

وتابع:" رحت الأهلي خلاص، كنت قاعد مع الكابتن عدلي القيعي، وقلت له: تخيّل الزمالك جاب جول وأنا احتفلت؟ أنا كده هبطّل كورة."

وأضاف:"قالي ما تقلقش، هتحبّ الأهلي، لكن قلبي مكانش هناك".

وأشار إلى أن مكالمة من ممدوح عباس كانت نقطة التحول:"كلّمني ممدوح عباس، وقالي عايز تعمل إيه؟ قولتله: عايز الزمالك، واعتذرت للأهلي ورجعت لبيتي".

 شيكابالا: العنصرية واجهتني صغيرًا

وتحدث شيكابالا عن بداياته، قائلًا: "في أول سنة ليا في الزمالك حسيت بالعنصرية، بسبب إن أنا من أسوان ولوني أسمر. بس كملت طريقي، وما ركزتش، والالتزام هو اللي وصلني."

شاهد الحلقة كاملة من هنا

 شيكابالا: كنا بنروح سينما وإحنا صغيرين.. ومش كل حاجة كورة

أكد شيكابالا أن جيله نشأ في بيئة متكاملة داخل مدرسة الموهوبين، موضحًا:"زمان ماكنّاش بنتدرّب بس... كنا بنروح سينما ونسمع مزيكا ونعيش الحياة. الطفل لازم يتعلم ويحلم، مش بس يركّز في الكورة".

وأضاف: "العيال دلوقتي بيتعامل معاهم صح... بيتعلموا يناموا كويس، يأكلوا صح. وده اللي كان ناقصنا زمان".

 شيكابالا: مدرستنا علمتنا يعني إيه نظام

وأشار شيكابالا إلى أن مدرسة الموهوبين الرياضية كانت سببًا في تشكيل شخصيته، قائلًا: "أنا وميدو كنا محظوظين إننا بدأنا هناك. تعلمنا يعني إيه نظام، يعني إيه تتحمل مسؤولية من بدري".

واسترجع ذكريات طفولته مع الراحل نبيل نصير، قائلًا: "كابتن نبيل نصير - الله يرحمه- كان بيديني 10 جنيه على كل جول، وكان أب حقيقي قبل ما يكون مدرب".

 شيكابالا: مستر كابرال أول من آمن بيا

وكشف شيكابالا عن المدربين الذين كان لهم تأثير حاسم في انطلاقته، قائلًا: "مستر كابرال هو أول مدرب طلعني الفريق الأول، وكان مؤمن بيا جدًا".

وتابع: "كابتن أحمد رمزي دعمني كتير في البداية، وساعدني أمشي الطريق بشكل صحيح".

 شيكابالا: من 7 لـ 14 سنة أخطر مرحلة في تكوين اللاعب

قال شيكابالا إن المرحلة العمرية بين 7 و14 سنة هي الأهم في مسيرة أي لاعب كرة قدم،  مضيفًا: "ده وقت التأسيس الحقيقي، واللي بيتبني فيه اللاعب بدنيًا وسلوكيًا ونفسيًا".

 شيكابالا: لازم نرجّع قيمة تيشيرت الزمالك

واختتم شيكابالا تصريحاته بنداء لجيل الناشئين: "زمان، كان اللعب للزمالك حلم، وكان مجرد إنك تعدي قدام أوضة اللبس للفريق الأول بيخلّيك تحلم".
وأضاف: "لازم نرجع قيمة تيشيرت الزمالك، ونربي الجيل الجديد على ده".