76 صورة نادرة.. خالد خلال يفتح ألبوم ذكرياته مع سميحة أيوب

خالد جلال وسميحة أيوب
محمد الهباء
نعى المخرج خالد جلال سيدة المسرح العربي الفنانة الراحلة سميحة أيوب التي رحلت عن عالمنا أمس عن عمر ناهز 93 عامًا.
وشارك خالد جلال جمهوره 76 صورة نادرة جمعته بالفنانة الراحلة، عبر حسابه بموقع "فيسبوك".
وعلق جلال على الصور قائلًا: "وهي يعني أم كلثوم ماتت؟ أمي حبيبتي بعد التحية والسلام، لأول مرة ما ألاقيش كلمات تعبّر عن مشاعر الفقد اللي حسيت بيها النهاردا، جايز علشان صعب أصدّق بعد طول الوقت معاكي إن البطلة مش هاتظهر مرة تانية".

وأضاف: "جايز لأن الحياة الحقيقية مش زي الفيلم اللي ممكن نشوفه كل يوم والبطلة تظهر في نفس الثانية ونستمتع بإبداعها.. آخر مرة تمثيل كانت في عيد الشرطة اللي قبل اللي فات.. وكنتي تعبانة قبلها وأصريت إنك تيجي ووافقتي، وكنتِ زي البدر على الشاشة وعلى المسرح وجه الحصاد الريس كلمك و كلمتيه و طلع علي المسرح و حياكي و قبل جبينك".

وتابع: "من تسع سنين كنا في المغرب وسمعتك بتتكلمي مع القديرة الراحلة ثريا جبران وقلت لك الكلام دا لازم نحتفظ بيه دا ميراث وقلتي تعالى نعمل كدا وعملنا سميحة أيوب تروي لخالد جلال سنة 2016 وسام عظيم بأفخر بيه لحد النهاردا إنك بتحكيلي".

واستطرد: "أنا والناس بتسمع حكاياتك، في كل رحلة وكل مكان كنتي موجودة وجودك سند وحماية وأمان وحنان وحب، وطيبة وقوة كل كلمة كنتي بتقوليها خبرة عمر ودرس عميق حتى وإنتِ بتهزري".

وواصل: "فكرتك أول مرة شفتيني سنة 1996 في روما مع العظيم الراحل سعد الدين وهبة وكنتوا راجعين من ألمانيا وزرتونا في الأكاديمية المصرية بروما".
وأضاف: "دخلتي بروفة مسرحيتي وسمعتيني وأنا بأخرِج وقلتي لازم نشوفك لمّا ترجع مصر وارجع بسرعة، ولما طلبت صوتك يحكي حكاية دفعة بعد الليل في حفل تخرجهم وحكيتي فبقت حفلتهم بقيمة الصوت والضوء من جمال صوتك".


وواصل: "لما طلبت منك تظهري علي شاشة افتتاح مهرجان المسرح العربي بالقاهرة وقلتي لضيوف مصر من كل الوطن العربي، أهلًا بيكم في مصر مهد المسرح العربي، إيه دا يا أمي هرم بيتكلم".

وأضاف: "فاكرة الرئيس حافظ الأسد لما سماكي سيدة المسرح العربي، طب فاكرة الرئيس أنور السادات وهو بيقول للرئيس جيسكار ديستان مدام سميحة توچووور كومبليه".
وتابع: "طب فاكرة وقفتك مع الست أمينة رزق في فرنسا وانتوا بتعملوا فيدرا، طب فاكرة وانتي ماسكة المسرح الحديث لما ابتدت حرب أكتوبر وخليتي العبقري محمد نوح وكل الفرقة يعملوا مدد مدد شدي حيلك يا بلد".
وواصل في حديثه: "طيب فاكرة التمثال اللي عملهولك عصام درويش كنتي فرحانة بيه قد إيه، أمي الحببية، كلامي ملخبط مش كدا، معلش ما هو ألف حكاية وحكاية معاكي برضه مش سهل ترتيبها في كلمتين هنا".


وأردف: "كنت دايما في لحظات الوداع اللي زي دي باكتب بالفصحي وأقول "الحزن عميق"، لأول مرة اكتشف إني ممكن أحزن أكتر من الجملة، ودايما كنت أقول للي رحل ادعيلنا بس معاكي باقولك اتطمني أنا هافضل ادعيلك ليل ونهار ماتخافيش".

واختتم جلال: "أخيرًا، اللي زيك يفضل عايش في القلوب والأرواح ومرفرف حوالينا علي طول، وأخيرًا يا سوسو الجميلة هازعل ليه، وهي يعني أم كلثوم ماتت، ما هي عايشة لحد النهاردا، تصبحي على خير، بحبك".








الأكثر قراءة
-
"فطروا سوا وخلص عليه".. هوس الآثار يكتب نهاية مأساوية لسوهاجي بالقاهرة
-
البوابة الإلكترونية لمحافظة الشرقية نتيجة الشهادة الإعدادية.. رابط مباشر
-
تنسيق التمريض 2025 محافظة الدقهلية بعد الإعدادية.. مؤشرات أولية
-
موعد إجازة 30 يونيو 2025.. قائمة العطلات المتبقية
-
لينك نتيجة الصف الثالث الإعدادي محافظة الإسماعيلية.. احصل عليها الآن
-
توزيع درجات العربي الصف الثالث الثانوي 2025.. كل ما تريد معرفته
-
تنسيق الثانوية العامة 2025 الإسكندرية.. مؤشرات أولية
-
مزارع يُضحي بحياته لإنقاذ "ماشيته" من حريق بسوهاج

أخبار ذات صلة
نانسي عجرم تستعد لإقامة حفل كبير بالجامعة الأمريكية في لبنان
19 يونيو 2025 09:34 ص
اللقطات الأولى من حفل زفاف ابنة ماجد المصري
18 يونيو 2025 11:11 م
رانيا يوسف: "الرقص في دمنا بس بنخجل"
18 يونيو 2025 10:00 م
محمود عامر يشكو قلة الأعمال الفنية: "بجد حرام"
18 يونيو 2025 09:54 م
ماجد المصري يحتفل بعقد قران ابنته ماهيتاب
18 يونيو 2025 09:45 م
"عرفت غلاوتي عندكم".. ملك زاهر توجه رسالة لجمهورها
18 يونيو 2025 09:42 م
"وتري" بعد الحكم لصالح إليسا: ليس انتصارًا قضائيًا
18 يونيو 2025 08:53 م
في عيد ميلاده.. سيد صادق يكشف أسباب ابتعاده عن الساحة الفنية
18 يونيو 2025 08:42 م
أكثر الكلمات انتشاراً