أسرة سلمى نبيل: “طحال أختنا اختفى.. وعرضوا علينا مليون جنيه”

هزّت واقعة وفاة سلمى نبيل، ضحية إهمال طبي، الشارع البورسعيدي، بعد تصريحات صادمة أدلت بها شقيقاتها «آية» و«رانيا» و«نورهان» في بث مباشر عبر "تليجراف مصر".

وكشفت شقيقات سلمى تفاصيل موجعة بشأن اللحظات الأخيرة من حياة شقيقتهن، والمعلومات الغامضة التي تلقوها بعد وفاتها داخل غرفة العمليات.

فتحوا بطنها بالطول والعرض

روت آية، إحدى شقيقات سلمى، تفاصيل المأساة قائلة: "فتحوا بطن أختنا بالطول والعرض.. واستلمنا جثتها وعضمها مكسور.. الطحال اتقال إنه اتشال، بس فين راح؟ محدش عارف له طريق!"

عرضوا علينا مليون جنيه

أضافت نورهان: "بعد الوفاة عرضوا علينا مليون جنيه.. بس ليه؟ علشان نسكت؟ ولا علشان أعضاء بنتنا؟ محدش وضّحلنا حاجة. المبلغ اتقال كده بشكل مباشر، وإحنا مش قادرين نفهم المقابل إيه بالضبط؟"

فارقت الحياة في عملية بسيطة

أكدت رانيا أن سلمى نزفت كميات كبيرة أثناء العملية، قائلة: "نزفت لحد ما فارقت الحياة.. إحنا مش مصدقين اللي حصل، وبنتنا كانت داخلة عملية بسيطة في الأساس."

جسمها اتشرح واتكسر وإحنا مش عارفين ليه

كشفت شقيقات سلمى علامات واضحة ظهرت على جثمانها، حيث قالت آية: "جسمها متشرح واتكسر.. وإحنا مش عارفين ليه؟ إزاي تدخل عملية وتخرج بالطريقة دي؟"

أخطأوا عمدًا في إعطاء الزوج خطاب مضلل

استرسلت نورهان موضحة أن الفريق الطبي سلّم زوج سلمى خطابًا مضللًا بعد وفاتها، قائلة: "في نص العملية، بعد ما هي توفت، إدوا لجوزها جواب غلط يضلله.. الجواب كان بيطلب 12 كيس صفايح دموية وأكياس دم وبلازما.. وهي أصلًا كانت فارقت الحياة. كل ده علشان يحملوه هو المسؤولية وكأنها ماتت بسبب نقص الدم!".

حساب العملية بـ15 ألف جنيه.. وأجر الجراح 6 آلاف فقط

قالت رانيا إن العملية كان من المفترض أن تُجرى بتكلفة 15 ألف جنيه فقط، موضحة: "6 آلاف جنيه كانت أجر الطبيب الجراح، والباقي مصاريف مستشفى ودكاترة أطفال وتخدير.. العملية بسيطة، بس اللي حصل مش طبيعي ولا مقبول".

واختتمت الأسرة حديثها برسالة ثقة في الجهات الرسمية، حيث قالت آية: "إحنا مؤمنين بالطب الشرعي ومصدقين في تحقيقات النيابة، وواثقين إن العدالة هتقول كلمتها وتجيب حق سلمى".