جهات التحقيق تستمع لأقوال والد زوجة عريس متلازمة داون بالشرقية

تستمع جهات التحقيق المختصة بمحافظة الشرقية، اليوم الخميس، لأقوال والد زوجة عريس متلازمة داون بعد حفل الزفاف الذي أثار الجدل.

أقوال والد زوجة عريس متلازمة داون بالشرقية

وقال والد عريس المتلازمة بالشرقية في تصريحات لـ"تليجراف مصر": "قسمًا بالله سألتها، وقلت لها: أنتي موافقة يا بنتي؟ فقالت نعم، وشرحت لها ظروفه ووافقت بكل رضا".

“متجوزين شرعي.. ومفيش حاجة غلط”

وأوضح الأب، أن الزواج تم بطريقة شرعية، قائلا: "الرسالة اللي حابب أوصلها إن العريس والعروسة متجوزين شرعي، ومفيش حاجة غلط".

وأضاف: "بنقول لأي حد عنده أولاد في ظروف مشابهة، اتقوا الله، لأن الكلام الجارح بيرجع لأصحابه، ويمكن يؤذي أولادهم بعد كده".

وروى الأب موقفًا مؤثرًا من نجله، قائلاً: "مرة جالي الساعة 12 بالليل وقال لي: يابا اخطبلي. قلت له: أنت اتجننت يا محمد؟ أخطبلك منين؟ شوفت عروسة؟ قال لي: مليش دعوة، عايز أتجوز".

وتابع: "كلامه كان صادم وبدأت أدور له على عروسة في كل مكان، وربنا أراد له البنت دي، وهي أصرت عليه، وفي شهود على ده".

ولفت الوالد إلى العلاقة القوية التي كانت تربطه بابنه، قائلاً: "والله ما كان بينام غير في حضني، ودلوقتي سابني. سألت العروسة: لو اتجوزتيه مش هتمشي؟ قالت: لأ، أنا راضية بيه، وشافته أكتر من مرة عند أخته في الشغل".

الحزن في الزفاف؟ "علشان التصوير بس"

وعن ظهور العروس بملامح حزينة في حفل الزفاف، قال: "هي كانت زعلانة عشان ملحقتش تروح الاستوديو تتصور زي باقي العرايس، وقالت لي: كنت عايزة أتصور علشان لو ربنا كرمني بولد أوري له صور الفرح".

"بنيت له بيت مخصوص"

وأضاف: "هما ساكنين لوحدهم في الصالحية، وابني قعد هناك 6 شهور بعد الجواز مش عايز يرجع لي. لما قررت أزوجه، اشتريت له قطعة أرض وبنيت له بيت عليها، وقلت له: عايز تبقى عندي ماشي، عايز تفضل هناك براحتك".

"أخاف على حقها.. ومش عايز أظلمها"

وشدد الأب على احترامه للعروس، قائلاً: "أبوها وأمها قالوا لها: لو سبتيه إحنا اللي هنزعلك. وأنا كمان أخاف على حقها، عندي أربع بنات متجوزين وكل واحدة معاها أولاد، ومقدرش أظلم حد".

واختتم: "ابني محتاج حد يرعاه بعدي، وأنا راجل عندي 70 سنة، رجلي والقبر. الناس بتتكلم ومش فاهمة حاجة، والبنت كانت زعلانة بس علشان اتأخرت على موعد الاستوديو مش أكتر".