شقيقة عريس متلازمة داون بالشرقية: "إنسان ومن حقه يتجوّز"

كشفت شقيقة الشاب “محمد” عريس الشرقية المصاب بمتلازمة داون تفاصيل جديدة عن عقد زواجه من فتاة عمرها 15 عامًا.

تفاصيل عقد زواج عريس متلازمة داون بالشرقية

وقالت شقيقة عريس الشرقية التي فضلت عدم ذكر اسمها: “إحنا في محنة شديدة بسبب السوشيال ميديا"، مؤكدة: "هم السبب في اللي وصلنا له”. 

وتساءلت في تصريحات لـ"تليجراف مصر": “فيها إيه لما محمد يتجوز؟ هو مش إنسان زي أي حد ومحتاج يتجوز عشان يخلف ويعيش زي أي شاب”.

وتابعت: “الناس مكبرة الموضوع عشان العروسة عندها 15 سنة، رغم أن نص البلد عندنا متجوزين في نفس العمر، وبعدين محمد أخويا متجوز على سنة الله ورسوله واللي مجوزه مأذون ومحامي”.

فيما قال والد العريس لـ"تليجراف مصر": "قسمًا بالله سألتها، وقلت لها: انتِ موافقة يا بنتي؟ فقالت نعم، وشرحت لها ظروفه ووافقت بكل رضا".

“زواجنا شرعي.. ومفيش حاجة غلط”

وأوضح الأب، أن الزواج تم بطريقة شرعية: "الرسالة اللي حابب أوصلها إن العريس والعروسة متزوجين شرعي، ومفيش حاجة غلط".

وأضاف: "بنقول لأي حد عنده أولاد في ظروف مشابهة، اتقوا الله، لأن الكلام الجارح بيرجع لأصحابه، ويمكن يؤذي أولادهم بعد كدا".

وروى الأب موقفًا مؤثرًا عن نجله: "مرة جالي الساعة 12 بالليل وقال لي: يابا اخطب لي. قلت له: انت اتجننت يا محمد؟ أخطب لك منين؟ شوفت عروسة؟ قال لي: مليش دعوة، عاوز أتجوز".

وتابع: "كلامه كان صادم وبدأت أدور له على عروسة في كل مكان، وربنا أراد له البنت دي، وهي أصرت عليه، وفي شهود على دا".

وأشار الوالد إلى العلاقة القوية التي كانت تربطه بابنه، قائلًا: "والله ما كان بينام غير في حضني، ودلوقت سابني. سألت العروسة: لو اتجوزتيه مش هتمشي؟ قالت: لأ، أنا راضية بيه، وشافته أكتر من مرة عند أخته في الشغل".

سبب حزن العوس في حفل الزفاف

وعن ظهور العروس بملامح حزينة في حفل الزفاف، قال: "هي كانت زعلانة عشان ملحقتش تروح الاستوديو تتصور زي باقي العرايس، وقالت لي: كنت عاوزة أتصور علشان لو ربنا كرمني بولد أوري له صور الفرح".

"بنيت له بيت مخصوص"

وأضاف: "هما ساكنين لوحدهم في الصالحية، وابني قعد هناك 6 شهور بعد الجواز مش عايز يرجع لي. لما قررت أزوجه، اشتريت له قطعة أرض وبنيت له بيت عليها، وقلت له: عايز تبقى عندي ماشي، عايز تفضل هناك براحتك".

"أخاف على حقها.. ومش عايز أظلمها"

وأكد الأب احترامه للعروس: "أبوها وأمها قالوا لها: لو سبتيه إحنا اللي هنزعلك. وأنا كمان أخاف على حقها، عندي أربع بنات متجوزين وكل واحدة معاها أولاد، ومقدرش أظلم حد".

واختتم: "ابني محتاج حد يرعاه بعدي، وأنا راجل عندي 70 سنة، رجلي والقبر. الناس بتتكلم ومش فاهمة حاجة، والبنت كانت زعلانة بس علشان اتأخرت على موعد الاستوديو مش أكتر".