أشرف محمود: لاعبو الأهلي كانوا أنانيين في كأس العالم للأندية

شهدت الساعات الماضية، تفاعلًا واسعًا من جماهير الكرة المصرية مع المعلق أشرف محمود، بعد انتقاده الحاد للاعبي الأهلي في مواجهة بورتو البرتغالي ضمن منافسات كأس العالم للأندية 2025.

وفي لحظة انفعال قال المعلق أثناء مباراة الأهلي وبورتو، موجهًا حديثه لثنائي الأهلي محمد مجدي أفشة وحسين الشحات “تصدق وتؤمن بالله، إيه ياعم ده، إيه اللي بتعملوه ده، على الأهلي أن يعيد حساباته في جميع المراكز”، ما جعله في صدارة "الترند".

وحرصت "تليجراف مصر"، على التواصل مع المعلق الرياضي أشرف محمود، لكشف كواليس تعليقه المثير خلال مباراة الأهلي، والتعرف على وجهة نظره بشأن أداء الفريق، خاصة الثنائي الشحات وأفشة، اللذين كانا سببًا رئيسيًا في حالة الانفعال التي ظهرت على صوته وأسلوبه أثناء التعليق.

حقيقة الانحياز للأهلي

وقال أشرف محمود: "لما بكون بعلق على مباراة لمنتخب بلدي أو فريق بيمثل مصر، بيبقى الموضوع مختلف تمامًا عن التعليق المحلي، أنا مش منحاز لأي فريق في الدوري، لكن لما نلعب دولي، طبيعي جدًا أبقى متحمس وأتمنى أن فريقي أو منتخبي يقدم أفضل حاجة، ساعتها بكون بتكلم كمشجع، مش بس كمعلق".

وأضاف: "عجبني بصراحة شوية تعليقات من الجمهور، اللي قالوا إن لو اللعيبة عندها نفس حمـاس المعلق، كنا جبنا كأس العالم، وده كلام له معنى أنا قلتها في التعليق كذا مرة، لازم الواحد يصدق نفسه، ويحلم، ويسعى لتحقيق الحلم، مش بس في الكرة، في أي حاجة في الحياة".

الصدق بالحلم أول خطوة للنجاح

وتابع: "يعني لازم اللعيب يبقى مؤمن إنه لاعب كبير، عنده عقد كبير، في نادٍ كبير، وبيلعب باسم بلد كبيرة، الأحلام مش حرام، بصوا على محمد صلاح حلم وصدق، واشتغل على نفسه، ونفس الحكاية مع مرموش".

انانية لاعبي الأهلي

واستكمل: "بكل صراحة، من وجهة نظري، لاعبو الأهلي كانوا أنانيين وبيلعبوا بطريقة فردية شوية، كل واحد عايز يبقى هو البطل اللي جاب الجول، وده شوفناه في كذا كرة، لو كانوا لعبوا بروح الفريق، كنا شفنا حاجة تانية خالص".

وأردف: "مثلًا، لقطة حسين الشحات ضد إنتر ميامي كانت ممكن تنهي كل حاجة، وضربة الجزاء اللي تريزيجيه خدها، كان المفروض يسيبها لوسام أو زيزو حسب الترتيب كانت هتفرق، وفي ماتش باتشوكا، تريزيجيه لعبها صح، دخل وسدد بكل قوة، لكن في ماتش ميامي، اتصرف كأنه بيعمل شو، مش بيركز في الكورة".

وعن مجموعة الأهلي في كأس العالم للأندية قال: "المجموعة سهلة جدًا، إنتر ميامي رابع الدوري الأمريكي، ولو شلنا ميسي، الفريق عادي، وفين المشكلة لو فوزنا على بالميراس؟ مفيش إعجاز في كده، الطبيعي إن الأهلي ينافس".

واختتم: "الأهلي محتاج يعيد حساباته في مراكز كتيرة، لازم تدعيم في مركز الظهير الأيسر، والظهير الأيمن، ومهاجم يكون سند لوسام".