جيران شهاب صاحب ترند "أرض الجمعية": "عمره ما زعل حد ومش بيشرب سيجارة" (فيديو)

أثارت واقعة الشاب شهاب، صاحب ترند “أرض الجمعية”، ضجة كبيرة عبر مواقع التواصل الاجتماعي خلال الأيام الماضية، بعد ظهوره في مقطع فيديو وهو يعتدي على مالك سيارة BMW على طريق الأوتوستراد.

أحد جيران شهاب: الفيديو مش كامل 

وقال أحد جيران الشاب شهاب في بث مباشر عبر “تليجراف مصر”، إنه جار شهاب منذ سنوات ويعرفه جيدًا، ومقطع الفيديو المنتشر تم قص أجزاء منه، لأن صاحب السيارة اعتدى عليه أولًا ثم رد عليه شهاب بما ظهر في الفيديو.

وأضاف أنه من غير المتوقع أبدًا أن يبدأ شخص بالاعتداء على آخر دون سبب، ومن المؤكد أن مالك السيارة هو من بدأ بالاعتداء أولًا، متابعًا: “أحنا مش بنقول شهاب مش غلطان، لكن صاحب العربية غلطان بردو وهو اللي بدأ الغلط الأول، وبعدين شهاب عايش معانا من زمان ومحترم مع الناس كلها ومصدرش منه أي غلط في حق حد قبل كده”.

جارة شهاب: ده واد محترم وعمره ما زعل حد 

وقالت إحدى جيران شهاب: “متربي معانا في المنطقة، وهو شاب مكافح وملوش في المشاكل، وأكيد الغلط بدأ الأول من صاحب العربية، لكن ده مش معناه إن شهاب مش غلطان، لأ هو غلطان بس أكيد ده كان رد فعل منه مش أكتر”.

أمه قلبها واجعها عليه

وأكملت جارة شهاب: “هو مش سفاح ولا مجرم علشان يغلط في الراجل ويشتمه من نفسه كده، وكان لسة حاصله حادثة من أسبوع وكان متعور ومتدمر وده ظهر في الفيديو، وبالرغم من كده مقعدش في البيت وخرج يشتغل بالتوك توك علشان يصرف على البيت، وأحب أقول للراجل صاحب العربية اتقي الله واعتبره ابنك، أمه قلبها واجعها عليه ده عيل عنده 15 سنة وهو اللي بيصرف عليها”.

صديق شهاب: اللي عمله شهاب في الفيديو بيقول إنه غلطان 

وقال أحد أصدقاء شهاب، إن الظاهر في مقطع الفيديو يؤكد أن شهاب غلطان، لكن الفيديو غير كامل، ولو كان كاملا سيظهر أن صاحب السيارة أخطأ قبل شهاب، متابعًا: “شهاب إحنا عارفينه من زمان وعمره ما عمل مشكلة مع حد قبل كده خالص”.

مش بيشرب سجاير ولا شاي 

وأضاف صديق شهاب: “كلنا في المنطقة عارفين إن اللي ظهر في الفيديو ده مش أسلوب وأخلاق شهاب، وشهاب ولا بيشرب مخدرات ولا سجاير ولا حتى بيشرب الشاي، وبعدين هو لما ماسك حاجة يتخانق بيها كان ماسك مفك موجود في أي توك توك، هو لو بلطجي كان زي ما الناس بتقول كان زمانه ماسك سلاح أبيض في الفيديو مش مفك”.

إحنا بنحب شهاب 

وقال أطفال المنطقة المقيم بها شهاب: “إحنا بنحب شهاب وهو أخونا الكبير، وعمره ما ضرب حد مننا ولا زعل حد، وبيعاملنا كلنا زي إخواته الصغيرين، وإحنا كلنا نفسنا شهاب يخرج من السجن”.