والد صاحب تريند "أرض الجمعية": "سائق العربية استفز ابني" (فيديو)

ظهر والد الشاب شهاب، صاحب تريند “أنا من أرض الجمعية” الذي أثار جدلا واسعا بين رواد السوشيال ميديا خلال الأيام الماضية، في بث مباشر عبر "تليجراف مصر".

والد شهاب: مش ابني اللي ظهر في الفيديو 

وقال والد شهاب لـ"تليجراف مصر" إن نجله عمره 15 عاما وكان يدرس في مدرسة محمد نجيب، وترك التعليم ليعمل سائق على توك توك ويساعد والده في مصاريف المنزل.

وتابع قائلًا: “مش هو ده ابني اللي ظهر في الفيديو، ابني شهاب عمره ما غلط في حد ولا دي تربيته، وعمره ما عمل كده مع حد، واللي خلاه يوصل لكده أكيد صاحب العربية اللي بدأ بالغلط، أنا مش بقول إنه مش غلطان، لأ هو غلطان طبعًا بس الغلط الأساسي من الراجل التاني”.

عرفت بالواقعة من واحد صاحبي شاف الفيديو على النت 

وأضاف والد شهاب، “كنت قاعد مع واحد صاحبي الساعة 1 بالليل وقالي الحق ابنك متصور فيديو ونازل على النت وهو بيغلط في واحد، واتفاجئت بعدها بناس صحاب شهاب بيقولولي الحق ابنك أخدته الحكومة على القسم، وروحت على القسم بسرعة علشان أشوف اللي حصل، وأنا متأكد أن صاحب العربية هو اللي استفز ابني وخلاه يعمل كده، لأن أنا لو مكان الراجل وحد خبط عربيتي أكيد هيكون ردي وحش، وده اللي عمله صاحب العربية”.

صاحب العربية قضى على ابني

وأكمل والد شهاب، “أنا بوجه رساله لصاحب العربية بقولة حرام عليك أنت مش بس ظلمت عيل، لأ أنت قضيت على مستقبله خالص، هو حقه إنه يزعل على عربيته، ويزعل كمان على الغلط بتاع شهاب، بس أنت كده دمرت ابني خالص، وأحب أقوله أنت مشكور إنك اتنازلت لابني في النيابة، لأني سمعت من الناس إنك اتنازلت”.

الناس بتقول عليه بلطجي 

وواصل “الناس بتقول إن القضية بقيت رأي عام، وأن شهاب بلطجي، حرام عليكم ليه عاوزين تضيعوا ابني، وبطلب من صاحب العربية ينشر الورق اللي بيثبت إنه اتنازل لابني، ولو عاوز يصلح عربيته أنا أصلحهاله بإيدي، أنا أصلا سمكري سيارات”.

الناس هتستفيد إيه من حبسته

واختتم والد شهاب حديثه لـ"تليجراف مصر" “هي الناس هتستفاد إيه من حبسته ده بيساعدني في مصاريف البيت وبيصرف معايا على أخواته، وبعدين هو لو اتحبس هيطلع إيه من جوه، أكيد الحبس هيخليه شخص وحش جدًا، وذنبه إيه عيل زي ده يتدمر ويتحبس بالشكل ده، وبطلب من الناس كلها تقف جنبي، ويعرفوا حقيقة شهاب”.