بعد الحكم بحبسه.. والد شهاب صاحب واقعة "أرض الجمعية": "ابني غلبان"

قال والد شهاب وليد، المتهم في واقعة “أرض الجمعية”، إن نجله تم نقله إلى قسم الشرطة عقب صدور الحكم عليه اليوم من محكمة الطفل بالأميرية بالحبس لمدة عامين، مع وضعه في مؤسسة عقابية.

وأضاف والد شهاب في تصريح لـ"تليجراف مصر": “ابني غلبان، وإن شاء الله المحنة دي تعدي على خير، وهنطعن على الحكم قريبا بإذن الله”.

وفي وقت سابق، اليوم، أصدرت محكمة الطفل حكمها بحبس شهاب لمدة سنتين، في القضية التي شغلت الرأي العام خلال الأسابيع الماضية.

توجيه رسالة لتقويم سلوك الشاب

وفي وقت سابق، قال المحامي هاني محمد دفاع الدكتور محمد عبدالجواد المعتدى عليه في الواقعة، خلال مداخلة هاتفية مع الإعلامي تامر أمين في برنامج "آخر النهار"، إن موكله لم يكن يسعى لتحقيق أي شهرة أو "ترند"، مشيرًا إلى أن نشر فيديو الواقعة جاء بدافع توجيه رسالة لتقويم سلوك الشاب، وليس بدافع التشهير أو التصعيد.

تعامل بمنتهى الرقي والهدوء

وشدد المحامي على أن موكله تعامل بمنتهى الرقي والهدوء، وكان هدفه الأساسي توعية هذا الشاب ومن على شاكلته، بضرورة احترام الآخرين والالتزام بقواعد الطريق.

والد الطفل شهاب

من جانبه، قال والد شهاب لـ"تليجراف مصر" إن نجله عمره 15 عامًا وكان يدرس في مدرسة محمد نجيب، وترك التعليم ليعمل سائق على توكتوك ويساعد والده في مصاريف المنزل.

وتابع: “مش هو ده ابني اللي ظهر في الفيديو، ابني شهاب عمره ما غلط في حد ولا دي تربيته، وعمره ما عمل كده مع حد، واللي خلاه يوصل لكده أكيد صاحب العربية (يقصد محمد عبد الجواد) اللي بدأ بالغلط، أنا مش بقول إنه مش غلطان، لأ هو غلطان طبعًا بس الغلط الأساسي من الراجل التاني”.

وأضاف والد شهاب، “كنت قاعد مع واحد صاحبي الساعة 1 بالليل وقال لي الحق ابنك متصور فيديو ونازل على النت وهو بيغلط في واحد، وفوجئت بعدها بناس صحاب شهاب بيقولوا لي الحق ابنك أخدته الحكومة على القسم، ورحت على القسم بسرعة علشان أشوف اللي حصل، وأنا متأكد أن صاحب العربية هو اللي استفز ابني وخلاه يعمل كده، لأن أنا لو مكان الراجل وحد خبط عربيتي أكيد هيكون ردي وحش، وده اللي عمله صاحب العربية”.

وأكمل والد شهاب، “أنا بوجه رساله لصاحب العربية بقول له حرام عليك أنت مش بس ظلمت عيل، لأ أنت قضيت على مستقبله خالص، هو حقه إنه يزعل على عربيته، ويزعل كمان على الغلط بتاع شهاب، بس أنت كده دمرت ابني خالص، وأحب أقوله أنت مشكور إنك اتنازلت لابني في النيابة، لأني سمعت من الناس إنك اتنازلت”.

وواصل “الناس بتقول إن القضية بقيت رأي عام، وأن شهاب بلطجي، حرام عليكم ليه عاوزين تضيعوا ابني، وبطلب من صاحب العربية ينشر الورق اللي بيثبت إنه اتنازل لابني، ولو عاوز يصلح عربيته أنا أصلحها له بإيدي، أنا أصلا سمكري سيارات”.

واختتم والد شهاب حديثه لـ"تليجراف مصر" بقوله: “هي الناس هتستفيد إيه من حبسته، دا بيساعدني في مصاريف البيت وبيصرف معايا على أخواته، وبعدين هو لو اتحبس هيطلع إيه من جوه، وذنبه إيه عيل زي دا يتدمر ويتحبس بالشكل ده، وبطلب من الناس كلها تقف جنبي، ويعرفوا حقيقة شهاب”.