هاني شنودة: عمرو دياب واجهة مصر.. وهذا رأيي في "خطفوني"

عمرو دياب وهاني شنودة

A . .A

كشف الموسيقار الكبير هاني شنودة، كواليس لقائه الأول مع الفنان عمرو دياب، مؤكدًا أنه كان أول من اكتشفه وراهن على موهبته، لذلك نجح في أن يكون واجهة فنية مشرفة لمصر، ولا يزال يبهره في كل عمل جديد يقدّمه.

وقال هاني شنودة خلال مداخلة هاتفية مع برنامج بنظرة تانية، تقديم الإعلامي محمود الجلفي على قناة الشمس: “أنا اللي اكتشفت عمرو لوحدي”، مضيفا: “فاكر أول يوم شفته، خبط على باب أوضتي في الفندق، وسمّعني صوته، وحسيت إني قدامي فنان حقيقي، وقولت له إنت عندك كل حاجة حلوة، إلا حاجة واحدة بس، إنك بتتكلم بورسعيدي ومش قاعد في القاهرة”.

واستكمل هاني شنودة: “تاني يوم لقيته جايلي تاني، وإصراره كان أقوى، واتعلم بسرعة، وفعلاً هو من النجوم اللي حاطين رجليهم على أرض صلبة”.

وعن أول تعاون بينهما، قال شنودة: “أول أغنية اشتغلنا فيها سوا كانت الزمن، بصراحة، لحد النهارده أنا معجب بيها جدًا، رغم إن أنا اللي ملحنها، بس كلام الدكتور زكي فيها عاجبني جدًا".

أهم ما يميز عمرو دياب

وتحدث “شنودة” عن أهم ما يميز عمرو دياب كمطرب، قائلًا: “عمرو دياب واجهة كبيرة جدًا لمصر، وكل حاجة فيه حلوة، ذوقه عالي جدًا، وكل مرة بشوفه في حفلة بلاقيه متجدد أكتر من اللي قبلها، وكل ما أسمع ألبوم جديد ألاقيه أحلى من اللي قبله، ومفيش حد ينفع يتحط جنبه”.

وعن رأيه في الألبوم الجديد للهضبة، قال شنودة: “إنتوا اتفاجئتوا مفاجأة سعيدة.. لكن أنا ما اتفاجئتش خالص، أنا متوقع من عمرو دياب دايمًا التجديد، ويعمل دايمًا أحسن".

عمرو دياب أم تامر حسني؟

وحول المنافسة بين عمرو دياب وتامر حسني هذا الصيف، قال شنودة مازحًا: "إنت بتكلمني في حاجة محسومة! يعني لما يبقى قدامك منجا وبطيخ وأناناس… تختار إيه؟ كله طبعا.. مفيش مقارنة بين الاثنين، كل واحد في مكانه، بس عمرو دياب حاجة تانية خالص".

ووجّه شنودة رسالة مباشرة للهضبة قائلاً: “برافو عليك يا عمرو، وبرافو عليك تاني، كتير من أعمالك هتفضل موجودة بعد ما كلنا نمشي".

وفي ختام حديثه، علّق الموسيقار الكبير على مشاركة ابنة عمرو دياب في إحدى أغانيه، قائلًا: “عمرو دياب عمل حاجة كان لازم تتعمل.. فرانك سيناترا خلى بنته تغني معاه، وفكرة إن البنت تغني مع أبوها دي بتخلق رابط وإحساس مكناش متوقعينه.. وده شيء جميل ومؤثر جدًا”.