وفاء عامر: أنا ست عنيدة ومش هسيب حقي

علقت الفنانة وفاء عامر، على الشائعات المنتشرة عنها في الفترة الأخيرة، والتي تتعلق ببعض الاتهامات بالتورط في تجارة الأعضاء.

تجمع 150 مليون جنيه

وأكدت  وفاء عامر، خلال مداخلة هاتفية في برنامج "الستات"، والذي يعرض عبر قناة "النهار" أنها أكبر نجمة مصرية عبر منصة "تيك توك"، وأنها لا تظهر إلا مع ناس بمستوى عالٍ، كما أكدت أن هي تحاول في الفترة الحالية جمع مبلغ مالي قدره 150 مليون من أجل مساعدة طفل، والشخص الذي أصدر عنها الشائعات يقصدها لأنها الأعلى مشاهدة عبر "تيك توك".

الموت و الـ  DNA

واستكملت: "كفاية عليا دعم الدكتور أشرف زكي واتحاد النقابات الفنية وزملائي، وده ضرب في القوة الناعمة، وإحنا مش ضعاف، لو دخلتوا على أسر الفنانين، إحنا مش ضعاف، عندنا نقيب قوي، واتحاد نقابات قوية، ونقابات تنمية عظيمة، نقابات مش هتسكت، ومحدش هيقدر يسكتنا غير بالموت".

وأردفت: “اللي بتفتري عليا وتتهمني، ادعت قبل كده إنها بنت الفنانة إيمان الطوخي والرئيس الأسبق حسني مبارك، وأنا بطلب منها تعمل تحليل DNA لإثبات إنها بنته، وده مستحيل إحنا معندناش رئيس وحش حكم مصر".

لماذا الصمت من إيمان الطوخي

وعن الفنانة إيمان الطوخي، قالت: "لماذا كل هذا الصمت من الفنانة إيمان الطوخي، ولازم تطلع تتكلم تقول مش بنتي، حتى لو هي محجبة أو معتزلة لازم تطلع تقول، ومش هتواصل معاها، هي يعني مش عارفه، وأكيد لها حد في العيلة شاف الموضوع، وهي متجوزتش، والبنت بتطلع تسيء للدولة، وأنا ست عنيدة ومش هسيب حقي، ودي مش 5 جنيه حد ناصب عليا".

أزمة وفاء عامر

واختتمت: "أنا بنت راجل محترم، وجوزي راجل محترم، وعيلتي فيها رجالة محترمين، ومبسوطين من موقفي، وقولتلهم محدش ليه دعوة، علشان يتقال ست جابت حقها، وزمايلي في منتهى الاحترام، ومحدش ييجي على القوة الناعمة، وبشكر كل النقابات والدكتور أشرف زكي، وهكون عايزة إيه أكتر من كده، أنا بعد الإشاعة دي أقسم بالله أنا كل ست كبيرة بتحضني، والعيل بيجري عليا، وهفضل كده ومحدش ييجي عليا، وبشكر كل جمهوري من قلبي بجد، وهي مش محنة دي منحة إدهالي ربنا، دي جايزة من عند ربي".

وفاء عامر وتجارة الأعضاء

يأتي ذلك وسط تعرض وفاء عامر لاتهامات تتعلق بتجارة الأعضاء، حرصت على نفيها مؤخرًا في بيان قالت فيه: “أرفض تمامًا الزج باسمي أو الإساءة لي أو لأي شخص من أسرتي في شائعات تمس مكانتي كفنانة وإنسانة”.

وزادت: "وأؤكد للجميع أنني لن أترك كل من وراء هذه الشائعات والادعاءات الكاذبة، وسأتخذ كل الإجراءات القانونية ضدهم هم ومن ورائهم".