والدة السائق ضحية عصابة المرج: "نفسي أشوف ابني وأخده في حضني تاني" (فيديو)

شهدت منطقة السلام بالقاهرة، واقعة مأساوية عندما أقدم تشكيل عصابي على استدراج سائق توك توك يدعى “أحمد” إلى منطقة المرج، وأنهوا حياته باستخدام آلة حادة وسرقوا مركبته.

والدة الضحية تروي تفاصيل الواقعة 

وقالت والدة أحمد في بث مباشر لـ"تليجراف مصر" إن نجلها طالب بالصف الثالث في الكلية، وكان يعمل على توكتوك بالوردية ليتمكن من تلبية مصاريفه واحتياجاته، وكان يتكفل بعلاجها من مرض كلوي، وفي يوم الواقعة خرج من المنزل قبل أذان المغرب، وذهب لعمله على التوكتوك.

قابلني الساعة 1 بالليل 

وأضافت الأم: “الساعة واحدة بالليل نزلت اشتري حاجات للبيت وقابلت أحمد بره وقولتله يلا نروح وقالي لأ روحي إنتي أنا لسة هشتغل شوية، وقولتله طيب متتأخرش، وبعدها روحت وفضلت قاعدة في البيت لغاية الساعة 4 الفجر، ولقيت صاحب التوكتوك بيتصل بيقول أحمد لسة مرجعش وتليفونه مقفول”.

قلبي كان حاسس إن في حاجة غلط

وأكملت الأم: “أنا قولت لصاحب التوكتوك أصبر شوية تلاقي تليفونه فصل شحن، بس كنت قلقانة وقلبي كان حاسس إن في حاجة غلط، ونزل أبوه يدور عليه لغاية تاني يوم، وروحنا دورنا في الأقسام بردو مفيش، وقعدنا يومين ندور عليه ومش لاقيينه، وبعدها كنت نايمة وجالي في الحلم قالي قومي ياماما يلا تعالي”.

جسمه كله طعنات في كل حتة 

وأوضحت الأم: "صحيت من النوم وقلت لجوزي يلا ندور عليه تاني ياعمرو ابنك فيه حاجه، وبعدها قسم المرج اتصل بينا، وروحنا لقيت واحد أسمر وجسمه كله طعنات في كل حتة، وأنا قولت إن ده مش ابني، بس عرفته من هدومه، والمباحث أخدت أقوالنا، وعرفنا إن المتهمين ركبوا معاه لغاية الرشاح وهناك خلصوا عليه وأخدوا التوكتوك.

لو قدامي مش هسيبه من حضني

واختتمت الأم حديثها لـ"تليجراف مصر" قائلة: “أحمد لو قدامي دلوقتي هاخده في حضني وأخبيه جوه عيني، ومش هسيبه من حضني أبدًا، أنا نفسي حقه يرجع”.