والدة هايدي فتاة الشيبسي: "نفسي تبقى دكتورة"

أثار فيديو واقعة فتاة الشيبسي وعابر السبيل تفاعلًا واسعًا في الساعات الأخيرة، بسبب ما فعلته الطفلة، فماذا قالت والدتها في أول ظهور لها تعليقًا على ما فعلته ابنتها؟

الظهور الأول لوالدة الطفلة هايدة صاحبة واقعة الشيبسي

خلال ظهورها في بث مباشر لتليجراف مصر، عبرت والدة الطفلة هايدي عن سعادتها الغامرة برد فعل الناس على الفيديو المنتشر، وفخرها الشديد بما فعلته ابنتها هايدي.

وتحدثت عن كواليس الواقعة قائلة: "بعت هايدي تجيب فطار زي كل يوم، لما رجعت البيت قالتلي فاضل معايا خمسة جنيه، كنت هجيب بيه كيس شيبسي، بس لقيت راجل غلبان فادتهاله ورجعت الكيس".

الأمر الذي اعتبرته والدتها عاديًا، رغم احتفائها بما فعلت، موضحة ذلك: "دي مش أول مرة تعملها وهي متعودة دايمًا تساعد الناس، وتلبي حاجة المحتاج".

رغبة في اكتناز الحسنات

وتابعت والدة هايدي: "فرحت بيها جدًا لما حكتلي، ومكنتش أعرف حاجة عن الفيديو، أختي اتصلت بيا كنت نايمة وقالتلي بنتك منشورلها فيديو على الفيس، وحسيت بفرحة لما لقيت الناس بتدعيلها، ومش محتاجين حاجة من حد الحمد لله".

وزادت أن هايدي أخبرتها أن صاحب المحل عرض عليها فيما بعد كيس شيبسي آخر كتعويض عن الكيس المتروك، ولكن هايدي رفضت بشكل قاطع حتى تحصل على ثواب ما فعلت: "الراجل قال لهايدي تاخد كيس مكانه بس قالت لأ، وإنه كدا الثواب هيضيع عليها".

نفسي تطلع دكتورة

وختمت: "هايدي دايمًا بتساعدني في البيت، وبتيجي تقولي ياماما أنا نفسي أفرحك، ونفسها تطلع دكتورة علشان تساعد الناس، والناس كلها والجيران فرحانين بيها، وإحنا متعودين نعمل كدا، علشان إحنا في الشارع مع الناس، وهي اتعلمت مننا".