إيهاب البدوي يكتب: علي ابن الجنايني منع ولاد الجناينية من دخول الحربية؟

يجب أن تعلم أن جمال عبد الناصر لم يدخل الكلية الحربية بمجهوده.  عبد الناصر دخل الكلية الحربية وسقط في الاختبارات زي كل المواطنين الغلابة. وبعدين خاله جابله واسطة من حد مهم فقبلوه بعد 5 شهور من رفضه وتغاضوا عن إن سنه كان كبر على دخول الحربية، يعني مكانش فيه شفافية ولا تكافؤ فرص أيام الملكية وكانت الحكاية بالكوسة برضه. والسادات بالمناسبة أبوه جابله واسطة عشان يدخل الحربية. 
عايز أسألك سؤال، أنت في بلدك عندك ضباط شرطة وجيش تعرفهم كويس. كام واحد فيهم ابن ناس أثرياء وكام واحد أبوه موظف في المجلس أو مدرس أو فاتح محل أو موظف في التأمينات، هتلاقي ولاد الموظفين هم الأغلبية. 
أهو ولاد الموظفين دول اللي عاشوا في بيوت مستورة واتعلموا لغة حوار محترمة وهما اللي على أكتافهم بيتبني الجيش والشرطة في مصر، بس ده ما يمنعش إن فيه نماذج نادرة قلوبها سودة وأهاليها كانوا غلابة بيقفوا في وش ولاد الغلابة عشان ما يدخلوش شرطة لا حربية ولا قضاء ولا خارجية ودول بالمناسبة مش ولاد عم عبد الواحد الجنايني دول ولاد “٠٠٠٠٠٠٠” معندهمش أصل.

أما حكاية علي ابن الجنايني وإنجي دي قصة فيلم كتبها يوسف السباعي ومش حقيقة  عشان تبني عليها فرضيات.

بس خلينا نسلم إنها حقيقة عايز أسألك سؤال. أنت شفت عبد الواحد الجنايني كان عايش في بيت شكله إيه وعايش إزاي، كل واحد من ولاده في أوضة والبيت نضيف ولغة الحوار بينهم راقية، 
أنا معرفش جناينية عشان أعمل مقارنة، بس أعرف بوابين، عايزك تشوف البواب عايش مع مراته وخمس عيال في أوضه وحمام في البدروم وقارن لغة الحوار بتاعة البواب وولاده ولغة الحوار بتاعة عبد الواحد الجنايني وعياله في الفيلم. 

وبالمناسبة 90% من أولاد البوابين خريجين جامعات وبيكسبوا من غسيل العربيات وتنظيف الشقق  وتقضية المشاوير أكتر من اللي حضرتك بتكسبه في الشهر وفيهم شباب متربي وزي الفل.. 
لكن عايز أسألك سؤال: أنت ترضى تجوّز بنتك لابن البواب اللي في عمارتكم وإحنا في ٢٠٢٥؟ يعني مثقفين ومنفتحين ومتحضرين وكده؟