كلام من القلب.. “وما توعدون”

في كتاب السر “The Secret” كاتبين إن في سر عظيم من أسرار الكون اسمه قانون الجذب، وهو إنك لو طلبت أي حاجة من الكون بإلحاح فالكون بيأتمر ليك لتحقيقها حتى لو بعد حين، وصناع الكتاب بيقولوا إن ده سر من أسرار كانوا الكهنة عارفينه عبر العصور. 

وأنا لما قرأت الجزء ده لقيت إنه في صميم الأديان السماوية أصلا، وفي ديننا الإسلامي تحديدا في آيات واضحة بقت تظهر لي وأفهم معناها لوحدي، زي مثلا:

يقول الله - تبارك وتعالى -: ﴿ وَفِي السَّمَاءِ رِزْقُكُمْ وَمَا تُوعَدُونَ * فَوَرَبِّ السَّمَاءِ وَالْأَرْضِ إِنَّهُ لَحَقٌّ مِثْلَ مَا أَنَّكُمْ تَنْطِقُونَ ﴾

فهمت من الآية دي إن أنواع الرزق نوعين:

 نوع هتاخده هتاخده حتى لو ماسعيتش ليه، زي ما يجيلك تليفون شغل أو حتى لو حد عزمك على حاجة، حتى لو مانزلتش من البيت هيجي لك لحد عندك. 

وطبعًا في رزق ثابت من الله زي الصحة والستر والعيلة والأصحاب الصالحين، وده كله في نص الآية الأول (وفي السماء رزقكم).

لكن النص التاني بيقول سبحانه (وما توعدون)، وده النوع التاني من الرزق، اللي هو بيطلبه العبد من ربه وربنا بيوعده بتحقيقه، يعني الموضوع مذكور عندنا قبل "كتاب السر" اللي مكسر الدنيا بره وغير ثقافات ناس كتير، واللي بيقولوا لفظ الكون مكان الله للدلالة إن الكون بيسمع وبينفذ طلباتك، مع إن هو الله، مالك الكون والبشر

وبيأكد كلامي مقولة الإمام علي بن أبي طالب: "الرزق نوعان، رزق يطلبك ورزق تطلبه"، الأول فضل من الله والتاني عدل من الله.

يعني لازم يبقى عند العبد ثقة ويطلب من ربنا كل حاجة وهو هيحققها مع الوقت، يطلب الصحة تكون أحسن، ويطلب الستر دايما، ويطلب سعة في الأموال، ويطلب الخير لأحبابه، ويحلم ويقول: نفسي في كذا وبحلم بكذا، خصوصا لو أثناء الصلاة، لأنها قنوات بيتم فيها توصيل مشاعرنا وطلباتنا وشكرنا لله عز وجل، حتى الأذان لو تتأملوا بيبدأ بكلمة "الله أكبر"، يعني الله أكبر من أي حاجة في إيدك دلوقتي، فتسيبها وتتوجه لله بالصلاة والدعاء، وممكن أكون مقصر، بس تقصيري ده أنا الخاسر الوحيد فيه.

مجرد فضفضة حبيت أشارككم بيها، يمكن توضح حاجات كتير لأي حد كان اليأس دخل قلبه،  وده أصعب شيء في الدنيا إنك تشوف شاب أو بنت في مقتبل العمر واليأس يتملكهم.

بقول لهم: الله خزائنه ورحمته وسعت كل شيء.. فاطلبوا رزقكم من الله اللي وعدكم بيه وهيحققه.