سبب صادم وراء جريمة إنهاء حياة أب وأطفاله الـ6 بالمنيا (انفراد)

تستكمل "تليجراف مصر" انفرادها بنشر نص التحقيقات الكاملة مع المتهمة "هاجر أ.ع"، التي اعترفت بتفاصيل جريمتها بإنهاء حياة زوجها وأطفاله الـ6 باستخدام مبيد زراعي في قرية دلجا بدير مواس بمحافظة المنيا، بدافع الغيرة عقب عودة الزوج لزوجته الأولى.

وجاءت أقوال المتهمة أمام جهات التحقيق كالتالي:

س: أين كان يضع زوجك تلك المبيدات؟

ج: كان بيشلهم عند باب البيت أول ما يدخل على طول من الباب الحديد.

س: وهل كنتي تطلعي على طبيعة تلك المبيدات واستخدامها؟

ج: لا.

س: وما هي تفصيلات إقرارك تحديداً؟

ج: اللي حصل إني جوزي رجع أم هاشم في البيت اللي اشتراه جديد بعد رمضان اللي فات، وكان بيقعد عندي أسبوع واحد وأم هاشم أسبوع، وفي يوم الأحد 6-7-2025 جالي ناصر وكان معاه محمد ابنه ودخل البيت وطلب مني إني أكل محمد، فعملت بامية وكان فيه ربع رغيف شمسي أنا كنت خبزاه قبل كده، وكان فيه علبة فاضية لونها أبيض قد كف الإيد بتاعة مبيد مرمية على السطح، كان ناصر جابها ورماها على السطح بعد ما استخدمها، وأنا حطيت فيها مايه ورجيتها وحطيت منها كام نقطة على العيش من ناحية قلب العيش وأديتهم لمحمد.

وتابعت، محمد أكل ربع الرغيف والبامية وبعد كده جوزي ناصر مشي ومحمد أكل ونزل من البيت، وبعدها بيومين عرفت إن محمد تعب وعنده سخونة، وعرفت الكلام ده لما أبو ناصر اتصل بيه وهو معايا عند دكتور النساء وقاله إن محمد تعبان. وبعد كده ناصر ودّى محمد للدكتور، وسألت ناصر عليه فقال لي عنده سخونة ودور برد عادي.

وأكملت، بعد كده في يوم الخميس 10-7-2025 وأنا بخبز كالمعتاد خبزت تسع أرغفة عيش شمسي، والفرن بيسيع أربعة بس، فخبزت أربع أرغفة، وبعد ما عجنتهم وكانوا نص سوى طلعتهم من الفرن وحطيت صابعي في كل رغيف وكبيت من العلبة اللي أنا حطيت منها قبل كده على العيش في الحتة اللي عملتها بصباعي، وبعد كده حطيتهم تاني في الفرن ولما طلعوا حطيتهم في شكارة لونها أبيض.

وأردفت، بعد كده خبزت الخمس أرغفة الباقيين، وبعدها رحمة عدت عليا واديتها العيش اللي حطيت فيه المبيد عشان توصله لأمها، وبعد كده رجعت لي تاني واديتلها شنطة سوداء فيها رغيفين عشان توصلهم لجدتها وجدها، وباقي العيش كان علشان أكلنا، لكن أنا مكنتش قصدي غير إني أتعبهم بس علشان تحصل مشكلة بينها (أم الأطفال) وبين ناصر، لكن لما حصل الكلام ده خدت العلبة اللي كانت فاضية وحطيت فيها ميه ورميتها في مقلب زبالة.

س: متى حضر زوجك ناصر ونجله محمد إلى منزلك وقدمتي للأخير ربع رغيف خبز شمسي وخضار بامية حسبما قررتي؟

ج: يوم 6-7-2025 بعد الضهر.

س: ما سبب حضور زوجك ناصر ونجله محمد إلى منزلك آنذاك؟

ج: هو كان قريب من البيت وجه.

س: كم من الوقت مكث في منزلك؟

ج: هو حوالي ساعة.

س: من الذي دعاكي إلى تقديم الطعام إلى محمد آنذاك؟

ج: هو ناصر اللي طلب مني ذلك.

س: وأين عثرتي على تلك العبوة الفارغة التي قمتي بملئها بالمياه ورجها حسبما قررتي؟

ج: لقيتها على السطح بتاع البيت.

س: صفي لنا شكل تلك العبوة تحديداً؟

ج: هي قد كف الإيد وبيضاء ومكتوب عليها بالإنجليزي وبلاستيك وليها غطاء لونه أزرق.

س: ومتى عثرتي عليها؟

ج: أنا شايفاها من فترة على السطح.

س: وكيف وصلت تلك العبوة إلى سطح منزلك؟

ج: هو ناصر كان جابها مع جردلين.

س: وفي أي شيء كانت تستخدم المادة التي كانت بداخل تلك العبوة؟

ج: أنا اللي عارفة إنه هو مبيد للزراعة فقط.

س: ومتى قمتي بإحضار تلك العبوة الفارغة من السطح؟

ج: هو أنا جبتها من السطح نهار السبت 5-7-2025 وأنا بنزل الجرادل من السطح عشان أغسلها.

س: وما الذي دعاكي إلى إحضارها من السطح؟

ج: هي كانت جوه الجرادل وأنا نزلت الجرادل من السطح وهي كانت جواهم.

س: ولما قمتي بالاحتفاظ بها؟

ج: لما ركنتها عند الفرن بس.

س: ما الحالة التي كانت عليها تلك العبوة آنذاك؟

ج: هي كانت فاضية خالص.

س: وما الذي دعاكي إلى ملئها بالمياه ورجها حسبما قررتي؟

ج: أنا مليتها ميه علشان أغسلها وأستخدمها، لكن لما محمد وناصر جُم رجتها وحطيت كام نقطة على القلب بتاع ربع الرغيف اللي اديته لمحمد علشان ياكله.