أبو الدهب: فيه ناس متربصة لحسام حسن ومفيش أي مساندة إعلامية (خاص)

أشاد محمود أبو الدهب، نجم الأهلي السابق، بالأداء الذي يقدّمه منتخب مصر تحت قيادة العميد حسام حسن، مؤكدًا أن التوأمان يتعرضان لانتقادات شديدة دون مساندة إعلامية.

التعادل أمام بوركينا وتحقيق المطلوب

وقال أبو الدهب في تصريحات خاصة لـ"تليجراف مصر"، منتخب مصر عمل أداء جيد أمام منتخب بوركينا، والناس زعلانة شوية علشان مكسبناش، لكن التوفيق مكنش معانا وضيعنا فرص كتير في المباراة، لكن حققّنا المطلوب وهو عدم الخسارة ومنتخب مصر بنسبة 100% هيتأهل لكأس العالم".

انتقادات حادة للتوأم حسن

وأضاف نجم الأهلي السابق: "حسام حسن بيتعرض لهجوم شديد منذ توليه المهمة، ورايحين نجيب مدير فني لمنتخب مصر التاني كان بيقطع في حسام حسن ليل ونهار وهو الكابتن حلمي طولان، يبقى فين المساندة؟".

دموع حسام وإبراهيم بسبب الضغوط

وعلق أبو الدهب على بكاء حسام وإبراهيم حسن قائلًا: "حسام وإبراهيم أنا عارف شخصيتهم وهما أقوياء جدًا وبكائهم ده كان من شدة الضغوطات اللي عليهم، وهما بيحاولوا يسعدوا الشعب المصري دايمًا وبيحاولوا يعملوا إنجازات وبرضو بيتعرضوا لانتقادات شديدة".

وأكمل: "الأداء مكنش حلو مع فيتوريا ولا مع حسام البدري ولا حتى مع كيروش، لكن فيه ناس متربصة لحسام حسن ومفيش أي مساندة إعلامية خالص".

الفارق بين صلاح مع منتخب مصر وليفربول 

وأتم أبو الدهب: "أداء محمد صلاح مختلف عن ليفربول بسبب إن اللاعبين في المنتخب مش مساعدينه على كده ومش بينفذوا اللي هو عايزه، بالإضافة إلى اختلاف الملاعب في أفريقيا عن أوروبا، وبتمنى محمد صلاح يلعب في مركز 10 هيعملها بشكل كويس جدًا.