أحمد نبيل: اتقالي عمرك ما هتبقى جزمة تشارلي تشابلن

كشف الفنان أحمد نبيل، تفاصيل تعلقه بفن البانتوميم من نعومة أظفاره، كما ألقى الضوء على لقائه المستشار الأمريكي لـ المكتبة الأمريكية في الإسكندرية، وتحدث عن علاقته مع الله.

وقال أحمد نبيل، خلال لقائه في بودكاست مع رئيس تحرير موقع “تليجراف مصر” سامي عبد الراضي: “ماكنتش بحب الغناء، ومش بحب الكلام الكتير، كنت بحب الحركة، وقلدت الممثلين والضيوف وأسرتي وكل حد، وكنت دايمًا في كل الجماعات المدرسية”.

وتابع: "ماكنتش بحب أقول نكت، كنت بحب الأفلام الصامتة، وبحب تشارلي تشابلن أوي، وبحب جيري لويس، والسينما كانت رخيصة نسبةً للأفلام الصامتة، وكنت أحضر 4 حفلات في اليوم، وكنت بقلد تشارلي شابلن في حركاته ولبسه، وألفت مشاهد خاصة بيّ، وكنت بعمل حفلات لحد فترة الجامعة".

جزمة تشارلي تشابلن

وواصل ذكرياته: "وأنا في حفل، كان المستشار الأمريكي لـ المكتبة الأمريكية في الإسكندرية بيتفرج، بعد الحفلة قال أنا عايز أقابله، بصلي وقالي عمرك ما هتبقى جزمة تشارلي تشابلن، أنا اتضايقت، وقولتله أه طبعًا، وكل الناس مبسوطة، قالي أنا اتبسط، وممكن بعد ما تخلص تلبس وتقابلني، قولتله طيب وكنت عايز أخرج أضربه، لبست وخرجت قولتله نعم، قالي ده الكارت بتاعي تجيلي في المكتبة الأمريكية، وهتعرف أنا قولتلك ده ليه".

بتقلد تشارلي

وتابع: "تاني يوم روحت المكتبة، قالي انت كنت متضايق، قولتله انت سعيد إنك ضايقتني يعني، قالي ليه متبقاش أحمد نبيل ليه تبقى تشارلي تشابلن، والناس بتقول عليك بتقلد تشارلي، وقالي اللي بتعمله ده فن أنا اتعلمته في أمريكا اسمه فن البانتوميم، الكلام ده سنة 62، كنت في أولى جامعة، وقالي أنا هعلمك، وترجملي كتب، وهقولك التمرينات، بس لازم تسافر برا، علشان ده فن لازم يتعلم، قالي تقدر تسافر برا، قولتله بسافر السيدة زينب بالعافية، قالي تقعد 10 سنين تتعلم، وأوعى تقول إنك فنان بانتوميم إلا بعد 10 سنين".

بكلم ربنا

وعن علاقته مع الله، قال: "شوفت أبويا بيصحى الفجر، وساعات قبل الفجر، وأسمعه وهو بيتكلم، بخش ألاقيه ساجد ومفيش حد، مرة سألته، قالي بكلم ربنا، مكناش أغنياء وأسرة بسيطة عادية، بس كان فيه سعادة وانبساط، وكان فيه خناقات برضو، بس كنا مبسوطين، واتعلمت ده منه".

عندنا الإيمان

واختتم: "الإنسان لازم يعيش يومه، وأعمل اللي إنت عايزه، بس متأذيش حد، مصر بلد إسلامية، وإحنا مسلمين أو مسيحيين، عندنا الإيمان، طول ما الإنسان عنده الإيمان، يبقى سهل يتعايش، ولازم يحس إن ربنا هو اللي بيرزقه وبيديله، وبياخد منه، ويعرف إن ربنا بياخد منه علشان مصلحته، في ناس بتقول طب ليه، ولما يقعد يفكر يقول الحمد لله إن حصلي كده، ولو كل واحد تقرب من الله هيبقى زي الفل، وعيشت تجارب كتير".