اسم الأم يكشف السر.. نص أقوال أمين معهد الفراعنة في واقعة رمضان صبحي

حصلت "تليجراف مصر"، على نص أقوال أحمد محمد جمال الدين، أمين عام معهد الفراعنة، في واقعة أداء شاب الامتحانات بدلًا من رمضان صبحي لاعب نادي بيراميدز ، في القضية المعروفة باسم، "تزوير معهد السياحة".

وجاء نص الأقوال على النحو التالي:

س: ما ظروف حالتك ونشأتك الاجتماعية تحديدا؟

ج: أنا عايش في أسرة مكونة مني أنا وزوجتي وثلاث بنات.

س: وما مؤهلك الدراسي تحديدا؟

ج: انا حاصل على تجارة خارجية حلوان شعبة محاسبة.

س: وفي أي عام تحديدا؟

ج: عام 1998، أنا خريج جامعة حلوان.

س: منذ متى وأنت تباشر ذلك الاختصاص؟

ج: أنا شغال في المعهد من 10/15/ 20000 وبعدين رحت معهد ثاني في التجمع 2005 وبعدين قعدت لحد 20009 وبعدين د/ أحمد عشوش صاحب المعهد طلبني تاني فرجعت، من 2009 حتى 2017، وبعدين كنت برجع المعهد على فترات لأنه حصل بينا خلافات بس هو كان سايب تأميناتي، وفي فترات التقييم كنت بروح وكنت باخد مقابل عادي ولما مشيت الدكاترة قالولي الدنيا باظت فرحت في شهر 1 لعام 2025 رسمي أربعة أيام في الأسبوع وحتى الآن.

س: ما معلوماتك بشأن الواقعة محل التحقيق؟

ج: اللي حصل إني عرفت أول ما رجعت المعهد إن عندنا مشاهير زي رمضان صبحي بيمتحنوا، فعرفت إن أول يوم الامتحانات 13/5/2025، وطبعا أنا مكنتش حاضر امتحانات الترم الأول، فقلت أمر وأشوف مين بيمتحن، وأثناء مروري لقيت كراسة الإجابة مكتوب عليها رمضان صبحي، فسألت إنت رمضان قالي أيوة رحت قلتله معاك إثبات شخصية قالي لا، قلتله إزاي، وكان معايا أحمد فتح الله قلتله هاتلي ملف الطالب رمضان من الشئون، وهو راح وجاب الملف ومعاه فرد الأمن محمد إبراهيم ولما أخدت الملف لقيت فيه صورة مؤهله والصورة الشخصية اللي فيه مش مطابقة ليوسف، وأنا قلتله اسم أمك إيه فمردش، وقالى أنا مش رمضان، فخدت ورقة الأسئلة وورقة الإجابة وقلت لمحمد إبراهيم هاته على مكتب العميد، وطلعنا المكتب، قلتله إنتم مين قلي إن فيه واحد اسمه طارق من المقطم هو اللي بيخلصلي كل حاجة ومسألتوش عن أي حاجة، فطلعت ورقة وقلتله إنه يكتب إنه حضر مكان رمضان صبحي الامتحان، وكتب وبالرقم القومي، وقالى إن فيه صورة على التليفون بتاعه، وعشان هو آيفون خليته بعتها لأحمد فتح الله وبعدين هو بعتهالي، وفضل لحد ما جه د/ طارق أبو سريع عشان يحقق معاه، ولما جه طارق إديته كل حاجة وهو عرض على العميد وصاحب المعهد وعمله المذكرات والتحقيق وسلموه للمركز وهو دا كل اللي حصل.

س: متى وأين حدث ذلك؟

ج: الكلام دا حصل يوم الثلاثاء 13/5/2025 بداية من الساعة 9 الصبح تقريبا في معهد الفراعنة العالي للسياحة والفنادق طريق سقارة قرية شبرامنت - مركز أبو النمرس بالجيزة.

س: وما بادرة علمك تحديدًا بالواقعة محل التحقيق؟

ج: اللي حصل إن كان أول يوم امتحانات في المعهد، وحيث إني مراقب عام المعهد أقوم بمتابعة سير الامتحانات ونظم الطلبة في اللجان، وفي اليوم دا أنا كنت مع أحمد افتتح الله، وقتها دخلنا لجنة في مدرج 15 وساعتها طلبت من الملاحظ اللى واقف على اللجنة إثبات شخصية لبعض الطلبة ودخلت جوا اللجنة وبدأت أبص على الإثبات.

س: وهل قصدت التوجه إلى تلك اللجنة تحديدًا؟

ج: أنا عرفت أول ما رجعت المعهد إن عندنا مشاهير زي رمضان صبحي بيمتحنوا فعرفت أن أول يوم امتحانات 13/5/202، وطبعا أنا مكنتش حاضر الامتحانات بتاعة الترم الأول فقلت أمر وأشوف مين بيمتحن.

س: وهل تقف على شخص ملاحظ اللجنة محل التحقيق؟

ج: لا أنا معرفش الملاحظين لأنهم مش موظفين في المعهد.

س: وهل نما إلى علمك قيام أحد بانتحال صفة الطالب رمضان صبحي ودخوله مكانه بالامتحانات؟

ج: لا هو كل اللي عرفته إن عندنا ناس مشهورة زى رمضان دا جاي تمتحن فرحت علشان أشوف رمضان ودخلت اللجنة دي علشان أشوفه ولقيت طالب بيقولى إنه رمضان ولما سألته على تحقيق الشخصية قالى مش معايا.

س: وهل من ثمة حوار دار بينك وبين المتهم آنذاك تحديدا؟

ج أيوة.

س: وما مضمونه؟

ج: لما سألته إنت رمضان قالى أيوة وطلبت منه تحقيق الشخصية وقالي إنه مش معاه قلتله طلع المحفظة ومكنش فيها غير الفلوس بتاعته ومكنش معاه أى إثبات شخصية.

س: ومن كان برفقتك آنذاك؟

ج أنا كان معايا أحمد فتح الله.

س: وهل شاهد المدعو أحمد فتح الله تلك الوقائع؟

ج: أيوة وأنا قلتله هاتلي ملف الطالب من الشئون.
س: وما الدافع من وراء جلبك لذلك الملف؟

ج: عشان أنا متأكد من صورة الشخص الموجود في الملف.

س: وهل استطاع أحمد فتح الله الإتيان بذلك الملف؟

ج: أيوة.

س: وهل قمت باستلام الملف والعثور على أي صور ومضاهاتها بالمتهم؟

ج: أيوة ولقيت صورة مختلفة ولقيت شهادة ميلاد فسألته عن اسم أمه من واقع ملف الطالب رمضان صبحي فمعرفش يرد وقاللي صراحة انه مش رمضان.

س: وما التصرف الذي بدر منك آنذاك؟

ج: أنا لقيت مشرف الأمن محمد إبراهيم كان جاي مع أحمد فتح الله قلتله هاته على مكتب العميد.

س: وهل أبصرت أي کارنيهات أو تحقیق شخصية خاصة بالمتهم آنذاك أو خاصة بالطالب  رمضان صبحي؟

ج: لا

س: وما قولك فيما أقره المتهم يوسف محمد سعد من قيامه بتسليمك كارنيه وإثبات شخصية خاصة بالطالب رمضان صبحى رمضان وعليها صورته؟

ج: الكلام دا محصلش ومكنش في أي كارنيهات.

س: ما السبب وراء قيام سالف الذكر فى إدلائه بتلك الأقوال؟

ج: أنا معرفش هو قال عليا كدا ليه.

س: وهل من ثمة خلافات بينك وبين سالف الذكر؟

ج: لا معرفوش ومفيش بينا أي خلافات.

س: وهل من ثمة تفتيش انصرف إلى الشخص المتهم يوسف محمد سعد؟

ج: انا مفتشتش ومشفتش حد فتشه.

س: وإلی أين قمتم باقتياده تحديدا؟

ج: إحنا أخدناه على مكتب الإدارة عند مكتب العميد في الدور الثالث.

س: وما التصرفات التي بدرت منكم عقب وصولكم وجهتكم بالمتهم؟

ج: إحنا طلعنا عند مكتب الإدارة وساعتها أنا قلتله إنتم مين بالظبط وساعتها قاللي إن اللي اتفق معاه واحد اسمه طارق وإنه يحضر مكان رمضان صبحى مقابل 500 جنيه، وقالي إن اسمه يوسف محمد سعد ووراني صورة بطاقته على التليفون وأنا أخدتها على تليفوني.

س: وما كيفية استحصالك على تلك الصورة؟

ج: هي كانت على تليفونه وهو آيفون فبعتها على تليفون أحمد فتح الله وأحمد بعتهالي.

س: وما التصرف الذى تم اتخاذه قبل المتهم / يوسف محمد سعد آنذاك تحديداً؟

ج: هو تم تسليمه للعميد والشؤون القانونية.

س: وما الفرقة الدراسية محل أعمال الامتحانات محل الواقعة محل التحقيق؟

ج: هي الفرقة الثالثة بالمعهد شعبة الدراسات السياحية.

س: وما المادة الدراسية محل أعمال الامتحانات محل الواقعة محل التحقيق للشعبة سالفة البيان؟

ج: هي مادة أعمال شركات السياحة ٢.

س: وما الموعد المحدد بجدول الامتحانات لتلك المادة تحديدا؟

ج: هو كان محدد لها يوم 2025/5/13 الساعة التاسعة صباحا بمقر المعهد.

س: وكم عدد الطلاب المقيدين بتلك الفرقة تحديدا؟

ج: أنا مش عارف العدد بالظبط لكن شعبة الدراسات السياحية فيها حوالي 500 طالب تقريبا.

س: وما رقم اللجنة محل الواقعة؟

ج: رقم اللجنة 27.

س: وكم عدد الطلاب تحديدا بها؟

ج: عدد الطلاب الموزعين على تلك اللجنة 32 طالب.

س: وهل ذلك الامتحان لتلك الشعبة سالفة البيان هو امتحان تخلفات أم مراحل عادية؟

ج: لا هو سنة عادية للعام الدراسي 2024/2025 وليس تخلفات.

س: وهل الطالب / رمضان صبحى رمضان مقيد بالفرقة الثالثة بمعهد الفراعنة للسياحة؟

ج: أيوة.

س: وما بيانات سالف الذكر وبيانات الملف الدراسي الخاص به؟

ج: اللي أعرفه إن اسمه رمضان صبحي.

س: وهل قام الطالب رمضان صبحى بأداء امتحانات بالمعهد والحضور بصفة رسمية؟

ج: مكنتش موجود في المعهد الترم الأول ولما سألت يوسف قلي إنه حضر مكانه الترم الأول.

س: وما كيفية قيام المدعو يوسف محمد سعد بارتكاب الواقعة محل التحقيق؟

ج: هو دخل اللجنة الخاصة بالامتحان وقعد الطالب رمضان صبحى رمضان واستلم كراسة الإجابة بدلا منه ووعرفت بعد كدا إنهم بيقولوا إنه حضر مكانه الترم الأول.

س: وهل المعهد يوجد به أفراد تكون وظيفتهم التحقق من شخصية المترددين عليه؟

ج: أيوة هو في أفراد أمن على البوابة الرئيسية بتاعة المعهد وبيتأكدوا من شخصية كل فرد ولكن نظرا لكونه معهد خاص فالمترددين على المعهد كثر خاصة في أوقات الامتحانات.

س: وهل تم الوقوف على شخصية المدعو يوسف محمد سعد؟

ج: هو مقدمش كارنيهات ومحدش وقف على شخصيته غير لما وراني بطاقته على تليفونه إنه يوسف.

س: وما المحررات التي قام المتهم يوسف محمد سعد بكتابتها محل الطالب رمضان صبحى رمضان أحمد تحديدا؟

ج: هو كان كتب ورقة الإجابة وكتب اسم رمضان صبحي ورقم جلوسه وحاجات زي إجابة السؤال الأول وبنفس الكتابة في السؤال الثاني والثالث ومضي في كشف الحضور بتاع المادة بس ممضاش انصراف.

س: وهل تلك المحررات ذات طبيعة رسمية؟

ج: أيوة ده ورق امتحانات رسمي خاص بالمعهد والمعهد يخضع لإشراف وزارة التعليم العالي.

س: وما قولك فيما ثبت بمحضر جمع الاستدلالات المؤرخ 2025/5/13 الساعة 8:37 مساء والمحرر بمعرفة أمين شرطة حسن على عامر "تلوناه عليه تفصيلا"؟

ج: اللي أعرفه أنا قلت عليه وأنا اتفاجئت بإنه بيقول على محمد إبراهيم إنه سهله دخول المعهد.

س: وما قولك فيما ثبت بمحضر جمع الاستدلالات المؤرخ 2025/5/14 الساعة 2:07 صباحا والمحرر بمعرفة أمين شرطة ربيع عبد التواب عبد العظيم "تلوناه عليه تفصيلا"؟؟

ج: اللي أعرفه أنا قلت عليه وأنا اتفاجئت بإنه بيقول على محمد إبراهيم إنه سهله دخول المعهد.

س: وهل قام المعهد بإصدار كارنيه للطالب رمضان صبحي؟

ج: أنا معرفش لأني مش اختصاصي.

س: وما وسيلة إصدار واستخراج الكارنيهات الخاصة بطلاب المعهد تحديدا؟

ج: هي الكارنيهات في المعهد بتصدر للطلاب المقيدين بالمعهد وتصدر من شئون الطلاب بصفة رسمية بعد سداد الرسوم والمختص بالكارنيهات موظف اسمه عصام.

س: وهل صدرت ثمة كارنيهات خاصة بالطالب رمضان صبحى رمضان أحمد مغايرة للحقيقة وعليها صورة مختلفة عن الصورة الخاصة به وبذات بياناته؟

ج: أنا معرفش.

س: وهل يمكن تقليد واصطناع الكارنيه الخاص بالمعهد؟

ج: على أد معرفتي وعلمي إنه ممكن تقليده وحصلت كثير زمان.

س: هل من ثمة علاقة أو خلافات بينك وبين أى من أطراف تلك الدعاوى؟

ج: لا.

س: هل لديك أقوال أخرى؟

ج: لا.