علاقة طارق "سمسار اللاعيبة".. أقوال شريف إكرامي بقضية رمضان صبحي

تواصل “تليجراف مصر”، كشف تفاصيل التحقيقات في قضية لاعب نادي بيراميدز رمضان صبحي، والمتعلقة بواقعة التزوير داخل معهد الفراعنة العالي للسياحة والفنادق، والتي هزت الرأي العام الرياضي خلال الفترة الأخيرة.

أقوال شريف إكرامي بقضية رمضان صبحي

وحصلت "تليجراف مصر"، على أقوال حارس مرمى نادي بيراميدز شريف إكرامي، الذي أدلى بشهادته الكاملة حول ما عرفه عن القضية وتفاصيل ما دار بينه وبين اللاعب رمضان صبحي وعدد من الأطراف المتورطة، كاشفًا عن ملابسات ما حدث منذ بداية الواقعة وحتى توقيف رمضان صبحي بمطار القاهرة أثناء عودته من معسكر الفريق في تركيا.

وجاء نص أقواله كالتالي:

س: ما معلوماتك بشأن الواقعة محل التحقيق؟
ج: اللى حصل إن احنا اتفاجئنا في شهر 5 تقريبا ولقينا المواقع على النت منزلة خبر إن حد دخل امتحان بدل رمضان صبحي وأنا كلمت رمضان وقتها وقلتله إيه الموضوع وقاللى في حد اسمه طارق كان بيجيبله اثباتات قيد من المعهد وإنه مبيروحش المعهد خالص وميعرفش عنه حاجة ولا يعرف مكانه فين.

وأكمل: طارق هو اللى كان بيجيب له الاثباتات مقيد في المعهد علشان يسهل بس مواضيع تصاريح السفر بتاعته في مقابل أنه كان بيحوله فلوس وبعدين تفاجئنا بعدها أن في حد اسمه عبد التواب بيرن عليه وطلب مقابلتنا وحددنا معاد عند أشرف. ع ورحنا كان معاه 2 تانيين ولقيناهم بيقلولنا على موضوع فرد الأمن وحسينا أنهم بيدخلونا في مواضيع كتير.

وقال: طلبوا مننا نحل الموضوع وكانوا جم متأخرين عن معادهم وكان عندنا تدريب واحنا رحنا على التدريب وسبناهم مع أشرف وبعدين النهاردة الفجر واحنا راجعين من معسكر التدريب في تركيا اتفاجئنا إن رمضان عليه تشابه أسماء ووقفونا في المطار وأخدوا رمضان وأنا أخدت منه حاجته شنطته وتليفونه وكنت معاه لحد ما اتعرض على النيابة النهاردة وهو ميعرفش أي حاجة عن الموضوع ولا ليه أي علاقة بالتزوير ولا المتهمين اللي فيه وكل ما في الموضوع أن رمضان قلي إن طارق كان بيجبله إثباتات القيد ومن حوالي سنتين مبقاش ياخد منه حاجة لأنه خلاص استخرج شهادة إعفاء نهائي وهو دا كل اللي حصل.

س: متى وأين حدث ذلك؟
ج: الواقعة كانت في شهر 5 على ما أتذكر والنهاردة الفجر اتمسك رمضان في المطار.
س: وما مناسبة وسبب تواجدكم في سالف الزمان والمكان ؟
ج: كنا جايين من معسكر تدريب من تركيا.
س: ومن كان برفقتكم آنذاك؟
ج: هو كنا لوحدنا وباقي المعسكر جاي على فترات ودفعات.
س: وما علاقتك وصلتك بالمدعو رمضان صبحي رمضان؟
ج: هو زوج أختي وأقرب كونه أخي الأصغر وزميلي في الفريق.
س: وما علاقة وصلة المدعو رمضان صبحي رمضان بالواقعة تحديداً؟
ج: أحنا أتفاجئنا في شهر 5 تقريبا ولقينا المواقع على النت منزلة خبر أن حد دخل امتحان بدل رمضان صبحي وأنا كلمت رمضان وقتها.
س: وهل من ثمة حوار دار فيما بينكما آنذاك؟
ج: ايوة
س: وما مضمون ذلك الحوار؟
ج: هو رمضان قاللى أنه كل صلته بالمعهد ده إنه بياخد منه إثباتات قيد عن طريق اللي اسمه طارق.
س: وهل تحصل المدعو رمضان صبحى على ثمة إثباتات قيد من المتهم طارق؟
ج: أيوة هو رمضان قالنا أنه أخد منه إثباتات قيد كان بيستخدمها في تصاريح السفر لحد ما طلع إعفاء نهائي من الجيش.
س: ومتى تحديدا صدرت له الإعفاء النهائي سالف البيان؟
ج: اللي أعرفه أنها من حوالي سنة ونص او سنتين.
س: ومتى كان تاريخ آخر إثبات قيد تحديدًا؟
ج: أنا معرفش رمضان صبحى اللي يسأل عنه.
س: وهل تم تقديم تلك الإثباتات إلى إدارة التجنيد؟
ج: أنا معرفش و يسأل في كده رمضان صبحى.
س: وما الذي أخبرك به المدعو رمضان صبحى بشأن المتهم طارق تحديدا؟
ج: هو قاللى أنه طارق شغال زى سمسار لاعيبة كورة وهو قاله على المعهد وخلاه يقدم فيه وكان بيجيب له إثباتات قيد علشان تصاريح السفر ولما الواقعة حصلت وعرفنا أن في حد اتمسك من على النت رمضان قاللى أنه ميعرفش أى حاجة عن الموضوع وأنه كان بيحول فلوس لطارق كل ترم علشان استخراج إثباتات القيد وعلشان تقديمات المدارس الخاصة بأولاده أنه لازم يكون الأب حاصل على مؤهل معين ورمضان قاللى أنه كان بيديله الفلوس في الأول كاش ومؤخرًا عن طريق "إنستا باي" وكان قبلها ممكن شيك وأنا معايا تليفون رمضان اللى عليه “الإنستا باي” وممكن نشوف التحويلات دى منه.
ملحوظة : قدم لنا الحاضر هاتف محمول ماركة ايفون 14 بروماكس وأن رمز المرور الخاص به هو وبالدلوف إليه لم يتبين تواجد ثمة محادثات مع الرقم الخاص بالمتهم طارق وبمحاولة فتح تطبيق الانستاباى تبين أنه ببصمة الوجه فقمنا بدعوة المدعو رمضان صبحى رمضان بداخل غرفة التحقيق وبعرضه عليه قام بفتحه على رضا منه وتبين بفحص التحويلات الصادرة والواردة وجود تحويل مبلغ مالى من الحساب الخاص بالمدعو رمضان صبحى إلى المتهم طارق على رقم هاتفه بقيمة 50 ألف جنيه بتاريخ 2025/4/13 وأقر لنا المدعو رمضان صبحى أنه الرقم الذي طلبه المتهم طارق المصرى وقام بتحويله له، ثم صرفنا خارج غرفة التحقيق ثانيا رفقة الحراسة المرافقة له، هذا وقد قمنا بأخذ و طباعة الايصال المثبت لذلك التحويل وقمنا بالتأشير عليه بما يفيد النظر والارفاق بتاريخ اليوم تمت الملحوظة.
 

س: وهل تحصل المتهم طارق محمد محمد على ثمة مبالغ مالية أخرى؟
ج:ايوة هو رمضان قاللى انه كل ترم بيحوله في حدود ٣٠ او ٤٠ ألف جنيه
س: وهل تحصل المدعو رمضان صبحى على شهادة الإعفاء النهائي من التجنيد؟
ج: أيوة هو أخد الإعفاء النهائي من حوالى سنتين أو سنة ونص.
س: وما هو الدافع من وراء التحويلات المالية للمتهم طارق على الرغم من عدم احتياج المدعو رمضان صبحى ثمة إثباتات قيد لتحصله على شهادة الإعفاء النهائية؟
ج: علشان هو لازم يبقى مؤهل عالى ويسأل في ذلك رمضان صبحى.
س: وما ظروف تقابلكم مع المدعو عبد التواب؟
ج: احنا اتفاجئنا بعدها أن في حد اسمه عبد التواب بيرن على رمضان وطلب مقابلتنا وحددنا معاد عند أشرف ورحنا كان معاه 2 تانيين ولقيناهم بيقلولنا على وضوع فرد الأمن وحسينا أنهم بيدخلونا في مواضيع كتيرة وطلبوا مننا أننا نحل الموضوع وكانوا جم متاخرين عن معادهم وكان عندنا تدريب واحنا رحنا على التدريب وسبناهم مع ا/ أشرف
س: وما هي ظروف ضبط واحضار المدعو رمضان صبحى رمضان تحديدا؟
ج: هو النهاردة الفجر واحنا راجعين من معسكر التدريب في تركيا اتفاجئنا أن رمضان عليه تشابه أسماء ووقفونا في المطار واخدوا رمضان وأنا أخدت منه حاجته شنطته وتليفونه وكنت معاه لحد ما اتعرض على النيابة النهاردة وهو ميعرفش أي حاجة عن الموضوع ولا ليه أي علاقة بالتزوير ولا المتهمين اللي فيه وكل ما في الموضوع أن رمضان قالي إن طارق كان بيجبله أثباتات القيد ومن حوالي سنتين مبقاش ياخد منه حاجة لأنه خلاص استخرج شهادة إعفاء نهائي وهو دا كل اللي حصل.
س هل من ثمة علاقة أو خلافات بينك وبين أي من أطراف تلك الدعاوى؟
ج: لا.