أبو سنة..تزوج 33 مرة ولديه 130 ابنا وحفيدا وإحدى زوجاته كانت "بتخطبله"

في إحدى قرى مركز مغاغة بمحافظة المنيا، يروي الحاج ربيع صاحب الـ 75 عاما، والشهير بـ"أبو سنة"، حكايته الاستثنائية مع الزواج الذي لم يتوقف عند مرة أو مرتين، بل وصل إلى أكثر من ثلاثين مرة، ويبدو أن العدد لا يزال في تزايد.

في برنامج "أنا غير" مع الإعلامية مجدلا خطار، جلس الرجل ليحكي تفاصيل تجربته الممتدة بدءا من الزيجة الأولى وهو في الخامسة عشرة من عمره حتى اليوم.

إرث عائلي من التعدد

قال الحاج ربيع: "جدي الحاج إسماعيل اتجوز 27 مرة، وابنه علي اتجوز 22 مرة، وأعمامي فيهم اللي اتجوز 7 واللي اتجوز 11 واللي اتجوز 4 واللي اتجوز 2، إنما والدي متجوزش غير واحدة بس لأنه كان عسلي شوية وأمي كانت جميلة".

33 زواجة.. والرقم ما زال مفتوحًا

وأضاف، "أنا اتجوزت 33 مرة، 30 رسمي و2 عرفي، وفيه زواجة مش هتكلم عنها، ومن يومي وأنا باتجوز 4 ما ينقصوش، ودايمًا نآكل مع بعض من صحن واحد، وممكن كمان أتجوز المرة الـ34 والـ35".

أبناء وأحفاد بالعشرات

وتابع: "من الـ33 زوجة، 19 بس اللي خلفوا، عندي 27 ولد و10 بنات، وعدد أولادي وأحفادي قرابة 130، وفيهم اللي متجوز ومخلف، وأعرف كل أولادي أنما أحفادي لا".

قوة وبأس في شبابه

وواصل: "كنت شقي زمان، لو ضربت واحد بإيدي يقعد يتألم شهرين، كنت بشد العربية بشعري بس بطلت بسبب تعويرة في راسي، ولو عينيا جت على واحدة وهي مخطوبة، كنت باخدها من خطيبها، وموضوع إنهم يقتنعوا بيا ويتجوزوني دا حب من عند ربنا".

أولى الزيجات وأغلاها 

يقول: "أول زواجة كانت وأنا عندي 15 سنة، وهي 16، بمهر 45 جنيها، وأعلى مهر دفعته نص فدان طين، بيساوي دلوقتي 1.5 مليون جنيه، وفيه واحدة اتجوزتها كان عندها 12 سنة وشعرها واصل للأرض".

أطول زواج

واستكمل: "أطول فترة جواز كانت مع أم مصطفى، قعدت معايا 37 سنة، واتجوزت عليها 14 مرة، كانت بتحبني وبحبها، وهي اللي كانت بتخطبلي لو عجبتني واحدة، تبص تلاقيني باصص لواحدة، تروح من ورايا تتفق مع أهلها وتقولي تعالى أنا خطبتهالك".

جدول للزيجات

وأوضح: "كنت عامل جدول: كل 3 أيام مع زوجة، ويوم راحة بين كل زوجة أقضيه مع صحابي، كل واحدة في شقتها، بغرفتها وتليفزيونها وتلاجتها وكل المكملات الكهربائية اللي بتحتاجها، ومصاريفها، ولو واحدة معجبتنيش أو أغضبتني، أطلقها وأديها حقها".

أسباب الطلاق

وأضاف:"الزواج زي البحر، بيروق ويعكر، ممكن أي زوج وزوجة يتخانقوا ويقولوا مش هنكمل وبعدها يرجعوا عادي، لكن احنا مخنا ناشف، والكلمة أقولها مرة واحدة.

وأكمل: "أسرع طلاق كان بعد 15 يوما، وأطول زواج مع أم مصطفى دام 37 سنة، وأكبر واحدة اتجوزتها كان عندها 52 سنة، وأصغر واحدة كانت 12 سنة".

"الست بتكسرها ست زيها"

وتابع "أنا ما بامنش إن الضرب بيأدب الست، وعشان تتأدب لازم تتجوز عليها، لأن ما بيكسرش الست غير ست زيها، لكن الضرب ممكن يودي للسجن لو مثلا ضرت واحدة وماتت، كنت أضرب ضرب خفيف، ضرب حبايب، والست لما بتحب راجل لو قطعها بالساطور تفضل تحبه".

عدل بين الزوجات

وعن العدل بين الزجات قال: "العدل مش في الأكل والشرب بس، لكن كمان في التقدير والاحترام، لو طلقت واحدة ومعاها أولاد، أديها نفقة لحد 18 سنة، أم مصطفى مثلًا كنت مديها بيت تعيش فيه".

أسماء الأولاد والأحفاد

واعترف: "أنا حافظ أسامي أولادي، لكن ساعات أنسى، ومسمي عبدالغني وخديجة ومحمد، حوالي 8 أسماء، مكررين مرتين من كتر النسيان، أحفادي مش عارف أساميهم كلهم، بس عارف عددهم من كل ابن، وبسأل أولادي على الباقي".

"أنا قادر وفاجر"

واختتم: "اللي يتجوز يا يكون قادر يا فاجر، وأنا قادر وفاجر، وأعطي الست حقها، وقد أهلها إني أقف قصادهم، ودلوقتي في سني ده 75 سنة لسه متقدملي حوالي عشرة".