والدة ضحية حلاق إمبابة: ضربه بمقص في قلبه عشان هزر مع أخوه (فيديو)

في جريمة بشعة أنهى حلاق حياة فتى أثناء ذهابه لشراء بعض الأغراض لوالدته في منطقة إمبابة بالجيزة.

حلاق ينهي حياة شاب بـ"مقص" في امبابة

تواصلت “تليجراف مصر” مع والدة المجني عليه، وكشفت تفاصيل رحيله قائلة: “ابني علي عنده 16 سنة، وكنا مقدمين له في مدرسة الأورمان، روحنا أنا وهو دفعنا المصاريف واتصورنا في المدرسة وكان بيحب الهزار والضحك مش بيحب يأذي حد، ودا بشهادة الناس كلها كان ليه شعبية كبيرة".

وأضافت: “هو شغال في معرض مراتب وبيرجع الساعة 11 بالليل، وفي يوم الواقعة طلع غير هدومه ولبس طقمًا أبيض، ونزل عشان يجيب حاجات من السوبر ماركت، كان نفسه يأكل كيكة، ونزل الساعة 2 بالليل، ومكنتش أتوقع أنه هيروح كده غدر، معملش حاجة غير أنه آمن للقدامه”.

وأكملت: "قبل الواقعة بيومين فتى في نفس عمر ابني وشقيق الحلاق، كانوا بيهزروا مع بعض، فالحلاق (25 سنة) شافهم وزق علي ابني وقال له متهزرش مع أخويا، علي سمع الكلام ومشي، لأنه مش بتاع مشاكل ولا ليه في الكلام ده، وجه بعدها بيومين وهو داخل السوبر ماركت لقى 3 داخلين وراه؛ الحلاق وأخوه الصغير اللي كان بيهزر مع علي ابني، وواحد تاني معاهم".

وقالت: "اتخانقوا مع ابني وفضلوا يزقوا فيه، لدرجة أن كتف علي ازرق من الزق والضرب فيه، وآخر حاجه قام ماسك جردل عشان يدافع عن نفسه، والحلاق جري على المحل بتاعه وجاب مقص وآلة حادة، وجاي يجري وعلي ابني كان مدي له ضهره، ولسه بيلف راح ضربه بالمقص في قلبه، ووصل لعمق 30 سم، أنا قلبي موجوع على ابني وبطالب بالقصاص".