"همشي من الكلية".. طالب طب يواجه التنمر بسبب عمله بالميكانيكا

تحولت قصة كفاح شاب صعيدي إلى حديث مواقع التواصل الاجتماعي، بعدما نشر مقطع فيديو على صفحته الشخصية حصد ملايين المشاهدات. 

حسن محمد ابن محافظة أسيوط، سرد خلال الفيديو تفاصيل تجربته القاسية في أول يوم دراسة له بكلية الطب، بعدما انتشر بين زملائه أنه يعمل في مجال ميكانيكا السيارات والسمكرة إلى جانب دراسته.

تفاصيل الواقعة

وقال حسن محمد في الفيديو: "أنا حسن محمد من أسيوط عايز أحكيلكم اللي حصل معايا في أول يوم دراسة ليا في كلية الطب، في ناس كتير من أصدقائي في الكلية عرفت بسبب الترند اللي طلع عليا إني شغال في ميكانيكا السيارات والسمكرة بجانب الكلية".

تنمر وسخرية

وتابع: "إمبارح كان أول يوم دراسة ليا في الكلية، وبصراحة لقيت أصدقائي اتغيروا معايا نهائي بعد الترند، والمعاملة اتغيرت تمامًا، وتريقة ونظرات مهينة ليا ومش حلوة، أنا عايز أعرف ليه بيعملوا معايا كده، أنا ذنبي إيه؟ الشغل عمره ما كان عيب بالعكس ده ستر وكرامة، أنا بشتغل علشان أعرف أصرف على نفسي وأكمل دراستي وأوصل لحلمي اللي أنا نفسي فيه، والشغل ده هو اللي هيخليني أوصل لحلمي وأكون معاكم في الكلية".

القصة تحولت

وأضاف: "اللي بيوجع في الموضوع إنه اتحول من ترند وقصة كفاح لتريقة وسخرية عليا، وأنا والله إنسان زي زيكم مليش ذنب في الظروف اللي ربنا حطني فيها، أنا بعمل اللي عليا وبكافح علشان أعيش مستور وأكون في مستوى كويس اللي أنا بحلم بيه، ولو الموضوع فضل كده وفضلوا يتريقوا عليا ويسخروا مني، أنا هسيب الكلية خالص".

شغلي هو اللي هيخليني أحقق حلمي

وأكد: "مش علشان أنا مش حابب أتعلم أو مش حابب الكلية أو مش حابب الدراسة، بالعكس بحبها، بس من غير شغلي مش هقدر أكمل، الشغل ده باب الرزق الوحيد اللي ممكن يوصلني بحلمي ومش هسيبه علشان كلام أو تريقة حد".

احنا بنكمل بعض 

واختتم حسن محمد رسالته قائلًا: "يا جماعة إحنا جايين نتعلم ونشيل بعض ونكمل بعض، مش نكسر بعض".