“بلوجر” تستغيث بعد تعدي خطيبها عليها

زعمت “بلوجر” تدعى آلاء عبدالوهاب في مقطع فيديو انتشر على مواقع التواصل الاجتماعي، أنها تعرضت لاعتداءات وتهديدات من خطيبها السابق، على حد قولها.

وأكدت أنها ظهرت في الفيديو ليس باعتبارها مؤثرة أو معروفة، وإنما كفتاة تريد أن توضح موقفها وتدافع عن كرامتها، مشددة على أنها ستلجأ للقانون لأخذ حقها.

تفاصيل الفيديو

قالت آلاء في الفيديو: "أنا مش طالعة كبلوجر والناس تعرفني، أنا طالعة أخد حقي وأرد على كل كلمة اتقالت غلط في حقي، عشان الناس تبقى شايفة الصورة صح، ولو حصلي حاجة بعد التهديدات اللي جاتلي تبقوا كلكم عارفين وشاهدين".

"ما عملتش حاجة وحشة طول الخطوبة"

وأضافت، “يعلم ربنا إني ما عملتش أي حاجة وحشة طول فترة الخطوبة، ولا غلطت في حقه، كل اللي فيها إننا متفقناش، ويوم الخميس بالليل نهيت الموضوع خلاص”.

"خطيبي زق بابا"

وتابعت: "ساعتها خطيبي دفع بابا في كتفه وكان هيمد إيده عليه، وجالنا تاني يوم قال أنا آسف وحقكم عليا، لكن بابا رفض إنه يرجع وقال له: طالما تطاولت على رب الأسرة يبقى هتتطاول على بنتي، ومش هينفع نرجع تاني".

"هددني بعد نص ساعة"

وقالت: “بعدها بنص ساعة رن عليا وقالي: أنا مش هاخلي حد ياخدك، شوفي هاعمل فيكي إيه دلوقتي، وجالنا البيت، بابا دخله وكنا فاكرين إنه هيتكلم عادي بخصوص الرجوع، لكن بعد ما دخل قال لبابا: بنتك مش كويسة، وقال كلام مينفعش يتقال ولا أي حد يرضاه على بنته، بعدين قلب الترابيزه، وحدف الطفاية في وشي، وطلع بره يرمي طوب في الشارع ويقول: البنت اللي قدامكم أنا واخدها على عيبها".

"لو أنا مش كويسة ليه خطبتني؟"

وواصلت: "أنت لو واحد سوي ومتربي كويس مش هتقول الكلام ده في نهاية الموضوع، ولما أنت شايف إن اللي قدامك دي مش كويسة، خطبتها ليه من الأول؟"

وأكملت: "رنيت على رب أسرته، قالي: لو عملتي محضر أو أذيتي ابني مش هخليكي تطلعي من البيت".

"هاخد حقي بالقانون"

واختتمت آلاء: "أنا وقعت مع حد بياخد حقه بدراعه، وأنا مش كده، ماليش غير بابا، ومش هسيب حقي، هاخده بالقانون عشان اتقال عليا كلام مينفعش يتقال، ولو حصلي حاجة ردوا غيبتي، عشان أنا مش كده، المحاضر اتعملت، ومش هسيب حقي حتى لو على موتي".