بلطجي ينهي حياة كريم لمنعه من بيع المخدرات.. ووالده: ابني مفرحش بالدنيا

شهدت منطقة بولاق الدكرور بالجيزة، واقعة مأساوية عندما أقدم عاطل على إنهاء حياة طالب طعنًا بسلاح أبيض، بسبب رفض المجني عليه وقوف المتهم أمام محله.

والد المجني عليه يروي تفاصيل الواقعة

وانتقل محرر “تليجراف مصر” إلى منزل المجني عليه ليرصد كافة جوانب وتفاصيل الواقعة، وبمقابلة والد كريم قال في بث مباشر: “ انا ابني الصغير محمد كان شغال في محل بلايستيشن، والمتهم كان بيشرب مخدرات في المحل وهو حاول يمنعه لكن مقدرش، بعدها اتصل بصاحب المحل وأخوه الكبير كريم، وراحله جري ولقي صاحب المحل بيطرد الواد من المحل”.

وأكمل: “كريم قاله مينفعش تبيع مخدرات ولا تشربها هنا ده محل أكل عيش، راح قاله طيب تعالي نتكلم بره المحل كدا، وحصل بينهم مشاده كلامية خارج المحل، وبعدها الواد مشي شوية وشتم على كريم، وفضل ماشي وهو بيشتم راح كريم قاله إنت بتقول إيه لغاية لما وصل في مكان بعيد عن المحل وقاله أنا هقعد عافية، ابني لسة بيقوله إنت بتقول إيه لقاه راح ضربه بالمطوة في إيده فتحهاله 12 غرزة”.

وأضاف: “كريم ضربه لوكمية، راح المتهم عورة مرة كمان في رجله، وكمل فيه ضرب بالسلاح في وشه وفي رقبته، وبعد كده طعنه بالمطواه في جنبه عملت تهتك في الرئة ونزيف”.

وأضاف: “بعدها الناس أخدوا ابني وراحوا بيه على مستشفى الفجر، وهناك حاولوا يوقفوا النزيف وحولوه على مستشفى قصر العيني، وقعد في المستشفى 3 أيام وكتبوله على علاج وخرج وقالوا ييجي تاني بعد 15 يوم، ومتقعدش جنب حد بيشرب سجاير علشان إنت عندك الرئة مخرومة ومش هتستحمل”.

وأوضح: “قعد معانا أول يوم في البيت وكان كويس، وتاني يوم أخوه الصغير قاله تعالي نخرج شوية نتفرج على الماتش، وبعد ما رجع بالليل راح يشرب من التلاجة ومقدرش يقفلها ووقع، وأخدته وجريت بيه على المستشفى وهناك قالولي ابنك مفيهوش نبض”.

بلاغ للشرطة

تلقى مدير أمن الجيزة، اللواء محمد مجدي أبو شميلة، إخطارا من نائب مدير الإدارة العامة لمباحث الجيزة، اللواء هاني شعراوي، يفيد بمصرع طالب على يد عاطل في منطقة بولاق الدكرور، وأمر رئيس قطاع غرب العميد عمرو حجازي، رئيس مباحث بولاق الدكرور المقدم أيمن السكوري، بالتوجه سريعا إلى مكان الواقعة.

مشادة كلامية تطورت إلى مشاجرة

وبالانتقال والفحص، تبين مصرع طالب 22 سنة، بطعنة نافذة بالصدر بسلاح أبيض (مطواه)، سددها له عاطل 26 سنة بسبب اعتراض المجني عليه وقوف المتهم أمام محله للألعاب الإلكترونية، فحدثت بينهما مشادة كلامية تطورت إلى مشاجرة، قام على إثرها المتهم بإخراج سلاح أبيض من طيات ملابسه وسدد طعنة نافذة بالصدر للمجنى عليه أودت بحياته في الحال، وفر هاربا بعد ارتكابه الواقعة.

القبض على المتهم

تمكنت الأجهزة الأمنية، من القبض على المتهم بعد هروبه بـ4 ساعات بمعرفة الرائد علي باسل، والرائد محمود الدالي، معاوني القسم، وتولت النيابة التحقيق وأمرت بتشريح الجثة لمعرفة سبب الوفاة والتصريح بالدفن.