19 سنة غربة.. أول تعليق من أسرة المصري المتوفى بالسعودية بسبب دورية أمنية

خيم حزن كبير على نجع عمران غرب بمركز نجع حمادي في محافظة قنا، بعد وفاة الشاب سامح نفادي محمد حجاب، إثر سقوط دورية أمنية سعودية على سيارته أثناء مطاردة بمدينة الرياض، حيث وقع الخبر كالصاعقة على أسرته وأهالي القرية، الذين لم يصدقوا أن الشاب المكافح، الذي سافر قبل أيام قليلة فقط، انتهت رحلته بهذه الطريقة المفجعة.

وفي أول تعليق للأسرة، تحدث طاهر، ابن عم المتوفى سامح نفادي، لتكشف كلماته عن مأساة إنسانية بكل تفاصيلها، وألم عائلة تعيش ساعات ثقيلة بين الصدمة والانتظار.

"نريد الجثمان"

قال طاهر في تصريحات لـ"تليجراف مصر": "إحنا طالبين تشييع الجثمان في أسرع وقت ممكن، لأن الموت داير علينا وزي الكأس، وأهم حاجة في الموت إن المتوفى يتدفن بدري، إحنا مش عاوزين الجثة تقعد أكتر من كده في السعودية".

وأضاف: "إمبارح الخبر جالنا الساعة 1 والبلد كلها بقت في حزن، سامح لسة شباب، عنده حوالي 42 سنة دلوقتي، ومتغرب من 19 سنة بيقدح في الغربة عشان يعيش حياة كريمة".

"دفن أمه وسافر"

وتابع حديثه بحسرة: "الأجازة دي نزل ووالدته اتوفت ودفنها من حوالي شهر، وبعدها ساعد في بناء مسجد، وبعدما انتهى من بناء المسجد سافر السعودية تاني من حوالي 20 يومًا، مكنش عايز يسافر وكان بيقول الغربة وحشة والغربة تربة، وكانت السفرية دي بالذات متعقد منها، لكن دا نصيبه، محدش بيهرب من النصيب".

"نقاش وعامل توصيل"

وأضاف: "كان شغال نقاش وبجانب كده بيوصل طلبات، معندوش بيت ولا أرض غير اللي أبوه سابها ليه هو وإخواته، منهم تلاتة في السعودية، وواحد في ليبيا مش عارف ينزل يحضر عزاء أخوه".

وواصل: "وقت الحادث محدش كان معاه من أسرته، كل واحد فيهم بيجري على أكل عيشه، وهي دي الغربة، الإنسان بيقدح عشان يجيب يوميته ويرجع".

"4 بنات وولد في ابتدائي"

وأكمل بصوت يغلب عليه الحزن: "والده متوفي من حوالي سنة، ومفيش حد من إخواته في البلد حاليًا، كلهم متغربين، مخلف 4 بنات وولد، أكبر بنت في سنة خامسة ابتدائي هي والولد، وواحدة في رابعة، وبنتين تاني توأم لسة صغيرين، زوجته حالتها صعبة، وفي صدمة محدش يعلم بيها غير ربنا، ربنا يتولاهم كلهم".

"البلد في حالة حزن"

وواصل: "الوضع حاليًا فوق السيء بمراحل، البلد من بعد صلاة الجمعة لحد الساعة واحدة بالليل في حالة حزن رهيب، إحنا قريتنا صغيرة، عدد سكانها كبير، لكن عدد البيوت والمساكن قليل، اللي عايش في بيت أبوه واللي في بيت أخوه، يعني ظروف ما يعلم بيها إلا ربنا".

وأكمل: "إحنا حاليًا مش بندور على أي حاجة غير إنه يرجع يتدفن في أسرع وقت، آه بنبص لمستقبل ولاده، بس دلوقتي عايزين ندفن الجثة، إكرام الميت دفنه، ده اللي بندور عليه، وبعدين نبقى نرفع اللي نرفعه من قضايا ونجيب له حقه، لكن دلوقتي عايزين نوديه للمكان اللي طلبه".

"نناشد سرعة نقل الجثمان"

وتابع: "كل اللي بنطالب بيه إن سرعة الإجراءات تتم، تواصل معانا الأستاذ خالد الهواري من مركز أبو تشت من القنصلية، وحاليًا ماشي في الإجراءات وقالوا لنا إن النهاردا إجازة، إحنا معناش حد غير ربنا، وبنطالب السلطات وكل الجهات المختصة بتشييع الجثمان لمصر في أقرب وقت".

"نداء للرئيس والملك"

واختتم: "نناشد الرئيس عبدالفتاح السيسي، وولي العهد السعودي محمد بن سلمان، بالتدخل لتسريع الإجراءات وحل الموضوع، مش عاوزين ابننا يقعد أكتر من كده في السعودية، دا ابننا وكلنا أبناء مصر".