سوزي الأردنية: عندي تمدد في الشرايين ورحت لدكتورة نفسية بسبب أختي مي

حصلت “تليجراف مصر” على تفاصيل التحقيقات مع البلوجر سوزي الأردنية، بشأن اتهامها بغسيل الأموال، ونشر مقاطع فيديو خارجة عبر حسابها الشخصي على “تيك توك”.

اعترفات البلوجر سوزي الأردنية

سوزي الأردني قالت أمام جهات التحقيق: “أنا اتولدت في المطرية في القاهرة وكنا قاعدين جنب بيت العيلة في دور أرضي. بابا موظف، وماما ممرضة وليا أختين مودة أصغر مني بـ8 سنين، ومي من ذوي الاحتياجات الخاصة. قعدنا في البيت ده لحد ما والدتي اشترت الشقة اللي قاعدين فيها دلوقتي في مساكن المطرية ومن ساعتها وإحنا قاعدين في البيت ده”.

وأكملت: “أنا اتولدت عندي تعب في صدري بيجي لي كحة شديدة وأهلي يجروا بيا على المستشفي وعرفوا إني عندي تعب مزمن ومن ساعتها وأنا بأخد أدوية لحد النهاردة عشان التعب اللي بيجي لي ده ومحدش كان عارف إيه المرض اللي عندي غير من شهرين بس اتشخصت وعرفت إن عندي حاجة اسمها تمدد في الشرايين. ودخلت مدرسة العقاد في المطرية وكنت داخلة فترة مسائية وبعدين لما كبرت دخلت مدرسة أسماء بنت أبي بكر الإعدادية في المطرية برضه، وبعدين لما دخلت الثانوي دخلت مدرسة السيدة بنات بس أمي خلتني أخدها من المنزل علشان أنا بتعب كثير ومش هعرف أروح المدرسة بشكل مستمر”.

التحقيقات بقضية سوزي الأردنية 

وأضافت: “وأنا في إعدادي كنت بتخانق معاهم في البيت بسبب أختي مي عشان صحابي مش بيحبوا يخرجوا معايا طول ما هي قاعدة معايا وقعدوا يتجنبوني بسببها لدرجة أن مبقتش أحب أختي ولا أهلي، وماما لما لقيت الموضوع كده أخدتني لدكتورة نفسية بالمطرية وخدت جلسات وقعدت تكلمني إني لازم أحب أختي ولما كبرت شوية الفترة دي عدت وعملت حساب على “تيك توك” وسميته (سوزي الأردنية) عشان مبحبش اسم مريم (اسمها الحقيقي) وده اسم الشهرة بتاعي وفضلت أعمل فيديوهات ومنزلهاش”.

وتابعت: “ومرة واحدة وأنا في ثانية ثانوي عملت فيديو ونزلته جاب لي حوالي ألف متابع وعمل 9 ملايين مشاهدة وبعدين بدأت أنزل فيديوهات باستمرار لحد ما الناس بدأت تعرفني وبدأت أفتح لايفات وبدأت أكسب فلوس من ”تيك توك" ومن اللايفات دي، وبعدين بدأت أعمل إعلانات والفلوس دي جبت بيها شقة تمليك عند ميدان المطرية، واتكتبت باسم ماما ودلوقتي أنا بوضبها".

وفي وقت سابق، كشف مصدر مطلع لـ"تليجراف مصر" حصيلة ممتلكات سوزي الأردنية المتهمة بغسل أموال قدرها 15 مليون جنيه وإخفائها من خلال شراء الوحدات السكنية.

ممتلكات سوزي الأردنية

وأكد المصدر أن مريم الشهيرة بـ"سوزي الأردنية" لا تمتلك سوى 135 ألف جنيه على محفظة (فودافون كاش) وليس لديها أي حساب بنكي، كما أنها تمتلك شقة بالتجمع وهي التي تسكن بها وحصلت عليها من أرباحها بإعلانات روّجت لها لصالح مطاعم ومحلات ملابس وأدوات تجميل.

اعترافات سوزي أمام النيابة

وخلال التحقيقات، وأثناء مواجهة سوزي بمقاطع الفيديو محل الاتهام، والتي تم تداولها على تطبيق "تيك توك"، أنكرت جميع الاتهامات، مؤكدة أن محتواها يقتصر على إعلانات مدفوعة الأجر لصالح مطاعم ومحلات ملابس وأدوات تجميل.

وقالت سوزي في أقوالها: “أنا باشتغل دعاية بس، وكل حاجة باتفق عليها مع أصحاب المحلات، ومفيش أي حاجة خادشة ولا مخالفة، معرفش ليه اتاخدت من الأساس”.

وأكدت أيضًا أن علاقتها بباقي الموقوفين في قضايا مشابهة لا تتعدى المشاركة في بث مباشر (لايف) عبر "تيك توك"، مقابل أجر مالي، دون وجود أي اتفاقات خارجية أو لقاءات شخصية.