"15 ألف جنيه في نص ساعة".. ماذا قالت الراقصة هندية في قضية الفجور؟

حصلت “تليجراف مصر” على نص التحقيقات الكاملة مع الراقصة “هندية”، في اتهامها بنشر الفسق والفجور، والتعدي على القيم الأسرية، وإساءة استخدام مواقع التواصل الاجتماعي.

وجاء في أقوالها أمام جهات التحقيق ما يلي: اسمي سمر وعندي 25 سنة وشغالة راقصة وعايشة في فيلا في الشيخ زايد.

نص التحقيقات مع الراقصة هندية

س: ما قولك فيما هو منسوب إليك من أنك متهمة بالتعدي على المبادئ والقيم الأسرية في المجتمع المصري وذلك على النحو المبين بالتحقيقات؟
ج: محصلش.

س: ما قولك فيما هو منسوب إليك من أنك متهمة بإساءة استخدام مواقع التواصل الاجتماعي على النحو المبين بالتحقيقات؟
ج: محصلش.

س: ما قولك فيما هو منسوب إليك من أنك متهمة بتحريض الناس على الفسق بإتيان أفعال وإشارات وأقوال وذلك على النحو المبين بالتحقيقات؟
ج: محصلش.

س: ما قولك فيما هو منسوب إليك من أنك متهمة بإنشاء وإدارة واستخدام موقع إلكتروني وحسابات خاصة على شبكة معلوماتية بهدف ارتكاب وتسهيل ارتكاب الجرائم محل الاتهامات السالفة على النحو المبين بالتحقيقات؟
ج: محصلش.

س: ما هي طبيعة عملك؟
ج: أنا بشتغل رقاصة شرقي في الفنادق زي كونراد وكمبينسكي وريد سي كالتون.

س: منذ متى؟

ج: أنا بقالى سنتين بشتغل رقاصة في القاهرة، كنت شغالة في الإسكندرية وفي فنادق بردو توليب وأزور والفورسيزون.

س: ما مدى تحصلك على ثمة ترخيص بمزاولة تلك المهنة؟
ج: أنا مقيدة في نقابة المهن التمثيلية منذ عام 2021.

س: اذكري لنا آلية عملك تحديدًا من حيث تنظيمه؟
ج: أنا عندي مدير أعمال اسمه سيد، وهو ده اللي بيدير أعمالي عن طريق إنه بيبلغني بمواعيد الأفراح وأماكنها والمبالغ اللي بيتم الاتفاق عليها، وأنا بأخد في 15 ألف جنيه في الأوردر بتاعي ومدته نصف ساعة.

س: كم عدد الحسابات الإلكترونية الخاصة بكِ على مواقع التواصل الاجتماعي؟
ج: أنا عندي حسابين رسميين، الأول على فيسبوك، والثاني على إنستجرام.

س: اذكري لنا اسم المستخدم لتلك الحسابات؟
ج: الراقصة هندية ديه صفحتي على فيسبوك وعلى إنستجرام hendya belly dancer وتحتها مكتوب hendya ahmed.

س: كم عدد متابعي تلك الحسابات؟
ج: في فيسبوك 80 ألف تقريبًا، وإنستجرام 400 ألف تقريبًا.

س: وهل تلك الحسابات عامة ومتاحة للكافة أم مقيدة؟
ج: آه هي الحسابات دي عامة، وأي حد يقدر يدخل عليها.

س: ما مدى قيامك بعمل إعلانات ممولة على تلك الصفحات؟
ج: لا أنا مش عاملة إعلانات ممولة على الصفحات دي.

س: من القائم على إدارة تلك الحسابات الإلكترونية؟
ج: أنا اللي بدير الصفحات دي. بنزل المحتوى بتاعي عليها، وأنا بس اللي معايا اسم المستخدم والرقم السري.

س: وبأي وسيلة تقومي بتحميل تلك المقاطع والصور؟
ج: أنا بنزل المحتوى بتاعي على الصفحات بتاعتي عن طريق جهاز اللاب توب بتاعي نوعه آبل وموبيلي سامسونج.

س: حددي لنا نوعه؟
ج: اللاب توب ماركة آبل، وموبيلي سامسونج هو اللي بنزل من عليه المحتوى، وموبيلي آيفون عليه فيديوهات ليا بردو بس مش بستخدم الحسابات الإلكترونية بتاعتي من عليه.

س: اذكري لنا مضمون محتوى تلك الحسابات؟
ج: فيديوهات ليا وأنا في شغلي برقص شرقي.

س: وبأي ملابس تظهري بها؟
ج: ببدل الرقص الشرقي.

س: كم عدد المقاطع المرئية محل تحميلك على تلك الحسابات؟
ج: أنا عندي حاجة وسبعين مقطع على الإنستجرام والفيسبوك.

س: وما غرضك من نشر تلك المقاطع؟
ج: تسويق ودعاية لشغلي علشان ناس تطلبني أكثر في الأفراح والمناسبات.

س: هل تتحصلين على ثمة أرباح بمجرد نشر تلك المقاطع على منصات التواصل الاجتماعي؟
ج: أنا مش بيجي لي أي أرباح من الصفحات ديه وده مكنش هدفي أصلًا.

س: ألم تقومي بإنشاء ثمة حساب إلكتروني على موقع التواصل الاجتماعي “تيك توك”؟
ج: لا أنا مليش حساب على التيك توك.

 تفاصيل واقعة الضبط

س: اذكري لنا ظروف ضبطك وعرضك علينا؟
ج: اللي حصل إن النهاردة حوالي الساعة 12 اللي هو صباح يوم 6 / 2 / 2025، أنا كنت قاعدة في الفيلا بتاعتي اللي في الشيخ زايد، وكنت قاعدة لوحدي وكنت طالبة أوردر أكل، وأنا بفتح الباب لبتاع الدليفري لقيت الناس دخلوا البيت، وكان في منهم واحد طلع الكارنيه بتاعه وقال إنه حكومة، وشفت أول اسم في الكارنيه، وقال لي "اطمني"، ودخل هو واللي معاه وفتشوا البيت وخدوا من البيت مبلغ 20 ألف جنيه ودي فلوس أوردر، وخدوا بطاقتي الشخصية والبطاقة الضريبية ورخصة السواقة وكارنيه النقابة واللاب توب وتليفوناتي اللي هم واحد آيفون 16 برو ماكس لونه ذهبي، والسامسونج لونه كحلي، وبعد كده خدوني على إدارة الآداب في ميكروباص أبيض ومش عارفة نمره.

أول ما دخلت الإدارة كنت عايزة أعرف أنا جاية في إيه، وفعلًا في حد جنبي في الكنبة قال لي من حقك تعرفي إنك جاية في إيه، وإن السبب إنه وراني بدلة رقص أنا كنت برقص بيها في مكان اسمه لندن في ممشى أهل مصر وديه كانت من أسبوعين تقريبًا، وقلت له "أنا أسفة"، وإن الفيديو اللي كان في اليوم ده أنا مش منزلاه على صفحتي، وإن في صفحة تانية هي اللي منزلاه، وقال لي إني جاية بسبب البدلة “سالوبيت شفاف”، واعتذرت وقلت له إني مش عارفة إن البدلة ديه هيحصل عليها كل المشاكل ديه وإني هبان بالمنظر ده، خصوصًا إنها بدلة مقفولة، ومحدش اتكلم معايا تاني، ولا حد فتشني، وجابوني على قسم ثان زايد، وبعد كده جابوني على النيابة، وده كل اللي حصل.

س: ما سبب ومناسبة تواجدك بالمكان والزمان سالفي البيان؟
ج: أنا كنت قاعدة في البيت لأن ده محل إقامتي في الشيخ زايد.

القبض على الراقصة

وفي وقت سابق، ضبطت الإدارة العامة لمكافحة جرائم الآداب الراقصة “هندية” داخل أحد الملاهي الليلية بمدينة الشيخ زايد، وذلك أثناء تقديمها فقرات وُصفت بأنها خادشة للحياء وتحرض على الفجور.

القبض الراقصة هندية بالشيخ زايد

ورصدت الأجهزة الأمنية مخالفات أخلاقية تمس الآداب العامة، في فقرات تقدمها الراقصة هندية تحرض على الفجور، ليتم القبض عليها وتم تحرير محضر بالواقعة، وإحالتها إلى النيابة العامة لمباشرة التحقيقات.

حبس الراقصة هندية

وأمرت النيابة في وقت سابق بحبس الراقصة "هندية"، 15 يومًا على ذمة التحقيقات، ووجهت لها تهم التعدي على المبادئ والقيم الأسرية، وإساءة استخدام مواقع التواصل الاجتماعي، والتحريض على الفسق.

التحقيقات بواقعة ضبط الراقصة هندية

وكشفت تحقيقات النيابة العامة بالشيخ زايد، برئاسة المستشار إيهاب العوضي، أن المتهمة "سمر.ز" الشهيرة بـ"هندية"، صورت مقاطع فيديو ترتدي فيها ملابس شفافة وفاضحة، تظهر من خلالها مواطن عفتها على مواقع التواصل الاجتماعي بهدف إثارة غرائز الرجال.

وأكملت التحقيقات، أن الراقصة تتعمد نشر هذه المقاطع لزيادة مشاهداتها واستقطاب راغبي المتعة الحرام، ما يحقق لها المزيد من المتابعين والمشاهدات، وهو ما يتنافى مع المبادئ والقيم الأسرية في المجتمع المصري.

وطلبت النيابة العامة تحريات موسعة من الإدارة العامة لمكافحة جرائم الآداب لفحص مقاطع الفيديو المنشورة على حسابات المتهمة الشخصية على مواقع التواصل الاجتماعي.

مضبوطات الراقصة هندية

وألقت الأجهزة الأمنية، بقطاع الشرطة المتخصصة بوزارة الداخلية، القبض على المتهمة داخل الملهى الليلي بالشيخ زايد وبحوزتها 20 ألف جنيه و2 موبايل ماركة آيفون.