صاحب أغنية "أنا بشحت بالجيتار" بعد حادث السويس: عربية أحلامي راحت وهبدأ من الصفر

كشف الفنان علي رؤوف، صاحب أغنية “أنا بشحت بالجيتار”، عن تطورات حالته الصحية بعد تعرضه لحادث مروري مساء أمس في محافظة السويس، إثر اصطدام سيارته بأحد الأرصفة في منطقة الغريب.

علي رؤوف: "حالتي مش حرجة ومحتاج راحة 3 أسابيع”

وكتب علي رؤوف عبر حسابه الرسمي على “فيسبوك”: “أحب أطمنكم عليا وعلى صحتي.. أنا بخير إلى حد ما، عندي شوية جروح وشرخ بسيط في منتصف القفص الصدري وكدمات شديدة في العمود الفقري، وبما إني صاحب الشأن بنفي أي خبر عن إني في حالة حرجة، أنا محتاج بس راحة من أسبوعين إلى 3 أسابيع، ومفيش داعي أتكلم عن الحادث أو تفاصيله”.

علي رؤوف: “أول عربية في حياتي راحت”

وأضاف رؤوف: “دي كانت أول عربية أجيبها في حياتي وكانت حلم من أحلام عمري، بس مادام جت في الحديد فا في ستين مليون داهية، كانت تحويشة سنين، بس اللي إيده في الماية مش زي اللي إيده في النار”.

وتابع علي رؤوف حديثه، قائلاً: “الخلاصة إني بخير ومش زعلان على حاجة، ومسيري أقوم بالسلامة وأبدأ من الصفر تاني، كل اللي طالبه منكم على قد حبكم ليا اتمنولي الخير، لإن أي نجاح أنا بوصله هو نتيجة 15 سنة تعب وكفاح”.

رسالة تواضع وامتنان

وأوضح علي رؤوف أنه لا يتباهى بممتلكاته احترامًا لمشاعر الآخرين، مضيفًا: “عمري ما اتكلمت عن العربية ولا حد كان يعرف إن معايا عربية أصلًا، لإني دايمًا براعي مشاعر الناس ومبحبش أستفز حد بحاجة هو نفسه فيها”.

واختتم رؤوف رسالته، قائلاً: “شكر خاص لرجال الأمن في السويس على إنقاذي أنا واللي كانوا معايا، وشكر كبير جدًا لأطباء المجمع الطبي في السويس على مجهودهم العظيم، ولكل أصحابي وحبايبي اللي سألوا عليا وكانوا معايا لحظة بلحظة”.

اقرأ أيضا:

صاحب مقولة "أنا بشحت بالجيتار"، تعرض البلوجر علي رؤوف لحادث أليم بالسويس