في الاتهامات الثلاثة، قرار جديد من المحكمة الاقتصادية بشأن البلوجر "أم مكة"

قررت المحكمة الاقتصادية حجز محاكمة البلوجر "أم مكة" في اتهامها بنشر محتوى خادش للحياء، ومحتوى غير أخلاقي، وغسيل الأموال، لجلسة 26 نوفمبر الجاري للنطق بالحكم.

نص التحقيقات مع أم مكة

وفي وقت سابق، حصلت “تليجراف مصر”، على نص التحقيقات في القضية، حيث كشفت المتهمة مصادر أموالها، وأوضحت حقيقة ظهورها مع "أم سجدة" في مقطع فيديو أثار الجدل، إضافة إلى تفاصيل خلافها مع البلوجر "مروة" الشهيرة بـ"بنت مبارك المزعومة".

س: هل حدث لشخصك ثمة تفتيش؟
ج: أه الضباط اللي في القسم أخذوا ذهبي وأعطوه لوالدتي.

س: وما صلتك بالمضبوطات المعروضة عليك الآن؟
ج: الحاجات اللي جبتوها من الشقة كلها بتاعتي.

س: وما هو مصدر تحصلك على تلك المضبوطات؟
ج: بالنسبة لمبلغ الـ400 ألف جنيه منهم 300 ألفًا من أرباح “فيسبوك” والـ100 ألفًا بتاعت شغل الفسيخ، وبالنسبة للـ210 ريالات سعودية دول كانوا باقيين مع والدتي لما كانت بتعمل عمرة وأنا احتفظت بيهم عشان رایحة أعمل عمرة وجواز السفر ده بتاعي، وقائمة الزواج دي وقت ما تزوجت سيد، و"الدي في آر" ده اللي بيسجل كل حاجه عندي في البيت، والإسدال الحريمي هو اللي كنت ظاهرة بيه مع أم سجدة في الفيديو، والأربعة تليفونات واحد منهم بتاعي، وواحد بتاع زوجي، وواحد لبنتي، وواحد لابن أخويا، والفاتورتين الموجودين دول بتوع اثنين منها، وبالنسبة للعدة بتاعت التصوير والفلاش، في حاجات منها تخصني وحاجات تخص ولادي بيحبوا يصوروا ساعات، وفواتير الذهب بتاعتي بس مش كلها، في حاجات بعتها وحاجات لسه معايا، ووالدتي استلمتها من القسم عشان أخدوها مني إمبارح لما كنت محبوسة بسبب إحدى القنوات، والعقود اللي موجودة هيا اللي بتثبت أملاكي والشقق والمحلات اللي أنا مأجراها، فكل الحاجات دي تخصني.

س: قررت سلفًا بالتحقيقات أن أرباح “فيسبوك” تقريبًا 1500دولار أمريكي، فكيف إذا تحصلت على مبلغ 300 ألف جنيه مصري من ذات التطبيق؟

ج: لا كان بقالي فترة مبخدش الأرباح فكانت مجمعة مدة على بعضها.

س: هل الحساب المسمى “فسيخ أم مكة” المتواجد على تيك توك وفيسبوك خاص بك؟
ج: أيوة.

س: وهل من ثمة أحد آخر يشاركك في التحكم بتلك الحسابات؟
ج: لا أنا اللي بنزل كافة المقاطع المصورة والمنشورات ومحدش تاني ليه تحكم فيها، إنما فيه بنات مسجلة لهم دخول على فيسبوك عشان يستقبلوا الأوردرات بتاعت المحل فقط، وملهمش علاقة بأي حاجة ثانية.

س: وهل هؤلاء الفتيات لهن صلاحيات في الدخول للحسابات الخاصة بك ونشر مقاطع مرئية أو منشورات؟
ج: لا، اللي ليهم بس إنهم يستقبلوا طلبات بتيجي للمحل عن طريق فيسبوك.

س: وهل قمتِ بتصوير المقاطع المرئية سالفة العرض عليك ونشرها على تطبيق تيك توك وفيسبوك؟
ج: أيوة ما عدا فيديو واحد.

س: وما هو المقطع المرئي المقصود تحديدًا في السؤال سالف البيان؟
ج: المقطع اللي أنا فيه أنا وأم سجدة.

س: وما هو قصدك من ذلك؟
ج: أنا اقصد إني أنا منزلتش الفيديو ده عندي في أي صفحة من صفحاتي.

س: وهل أنت المرأة المتواجدة بالمقطع المرئي بجانب المدعوة “أم سجدة”؟
ج: أيوة، والفيديو ده الوحيد اللي مش مظبوط ومش منضبط، وأنا بعت لأم سجدة وقلت لها متنزلوش عشان فيه غلط.

س: وما الذي دعاكي إلى تصويره إذا حال علمك بأنه مقطع مرئي غير منضبط على حد قولك؟
ج: هو اللي حصل إنها كانت بترد على البنت اللي اسمها بنت مبارك علشان كانت بتتهمني باتهامات باطلة.

س: وهل يستدعي ذلك قيامك بتصوير مقطع مرئي منافي للآداب العامة والقيم المجتمعية ونشره على مواقع التواصل الاجتماعي؟
ج: لا أنا كنت ضد إنه هو ينزل وعشان كده منزلتوش عندي.

س: وكيف ذلك وقد ظهر تأييدك وتفاعلك وقبولك للأفعال والألفاظ التي أدلت بها المدعوه "أم سجدة" بالمقطع المرئي إبان عرضه عليكِ؟
ج: هو وقتها ده اللي حصل، بس أنا كنت ضد الفيديو وبعت لأم سجدة من تليفوني وقلت لها تمسحه لما نزلته وقبل ما يطلع ترند.

س: عود على بدء قررتي سلفا قيامك أنت والمدعوة “أم سجدة” للرد على اتهامات باطلة من أحد الشخصيات وتدعى بنت حسني مبارك فما هي تلك الاتهامات الباطلة؟
ج: إنها قالت عليا شغالة في المخدرات وغسيل الأموال.

س: وما هو سبب إلقائها لتلك الاتهامات؟
ج: لأني كنت رديت على الفيديو اللي هيا نزلته للفنانة وفاء عامر وقلت لها استني بقي البلاغ في الحكومة، فهي رمتني بالاتهامات الباطلة دي.

س: وما هي البيانات الكاملة لسالفي البيان المدعوة أم سجدة وبنت حسني مبارك؟
ج: أم سجده اسمها نوسة تقريبًا، والثانية اسمها مروة، بس معرفش أي بيانات ثانية عنهما.

س: وما هو سبب عدم قيامك بتقديم بلاغ واتباع الطريق القانوني السليم بدلًا من قيامك بتصوير ذلك المقطع المرئي؟ وهل قمتِ بحذف ذلك المقطع المرئي؟
ج: أنا قلت لأم سجدة تمسحه وهي فعلا مسحته من على التيك توك، بس لم تمسحه من على الفيسبوك عشان جاب مشاهدات كثير وليه أرباح.

س: وما هي عدد المشاهدات التي تحصل عليها ذلك المقطع المرئي المذكور؟
ج: تقريبًا 600 ألف مشاهدة.

س: وما هي الأرباح التي عادت من ذلك المقطع؟
ج: معرفش بالظبط بس هو ممكن الفيديو الواحد يجيب 4 دولارات كده يعني وحسب عدد المشاهدات.

اقرأ أيضًا

"أم مكة" تكشف تفاصيل مثيرة عن فيديو "أم سجدة وبنت مبارك" (خاص)

من الزفارة إلى العمارة.. طريق المليونيرات يبدأ بـ"فسيخ أم مكة"

ثروة البلوجر أم مكة.. ملايين الجنيهات وشقق وسيارات فارهة