"ضربني باللكمات ودهسنا بالعربية"، أقوال المجني عليه في واقعة ملاكم الشيخ زايد

كشفت التحقيقات في واقعة الاعتداء على أسرة بمنطقة الشيخ زايد، والمتهم فيها شاب يمارس رياضة الملاكمة، تفاصيل جديدة وشهادات مهمة أدلى بها أحد المجني عليهم، الذي تعرض لإصابات بالغة، نقل على إثرها إلى المستشفى وأجريت له فحوصات وإجراءات طبية.

نص أقوال المجني عليه في الواقعة

وتستكمل “تليجراف مصر”، نشر نص التحقيقات مع المجني عليهم، والتي تقرر تأجيل أولى جلسات القضية إلى 29 نوفمبر الجاري للنطق بالحكم وجاءات كا التالي:

س: ما تفصيلات حدوث الواقعة محل التحقيق وحدوث إصابتك تحديدًا؟

ج: اللي حصل إن المتهمين اللي اسمهم علي مصطفى عصام الدين، عصام مصطفى الحص عصام الدين، توأم مع حازم ابن خالي في المدرسة اللي اسمها "نيو فيش"، وعلى طول بيضايقوا حازم وبيتخانقوا معاه وبيضربوه في المدرسة، وحازم مش بيعرف يعملهم أي حاجة علشان هو لوحده، وفي حالة ومش بيحب المشاكل.

وفي يوم الواقعة، يوم الأربعاء الموافق 15/10/2025 الصبح وهما في المدرسة، بدأ علي وعصام يضايقوه تاني، وراحوا ضربوه على قفاه بالقلم. وبعدين باقي زمايلهم اتلموا والموضوع خلص. وبعدين حازم روّح بيته وكنت عنده وحكى لي كل اللي حصل.

وإحنا قاعدين في الجنينة بالليل في بيت حازم، سمعنا صوت عربية جولف مشغلة أغاني عالية جنب الفيلا، وساعتها حازم قالي دول علي وعصام، وجايين يضايقوه تاني. قولتله كلمهم علشان نتأكد، ولو هما هنتطلعلهم. وفعلاً كلم واحد فيهم وطلعوا هما.

قولت لحازم أنت اطلع لهم وأنا هاجي وراك بعد شوية علشان ميفتكروش إننا عايزين نتخانق. وهو طلع واتكلم معاهم، وطلعت وراه، وروحت لهم، وقلت لهم مينفعش اللي بتعملوه مع حازم، انتوا زمايل. قالولي: "لو يعرف يجيبنا يجيبنا ويورينا". انفعلت عليهم، وبعدين جالهم تليفون ومشيوا.

بعد نص ساعة واحد منهم اتصل بحازم وقاله: "تعالى عند نادي بيفرلي هيلز انت وقريبك، ولو مجيتش هنكسر عضم وشك في المدرسة بكرا". حازم قفل وحكى لأبوه، وقال لباباه اللي هو المجني عليه أحمد محمد عبد الخالق. باباه قاللي أخده وأروح لهم وهو هيوصلنا ويقف بعيد علشان ميبانش إنه جاي يتخانق.

روحنا، وحازم اتصل بيهم، وقالوله واقفين عند عربية "ميني كوبر" أورنج. لقينا أخوهم محمد مصطفى عصام الدين، وده بطل ملاكمة. وعلي وعصام مكانوش موجودين.

اتكلمت معاه في الأول بهدوء، وقاللي: "هو ينفع كبير زيك تتخانق مع عيال صغيرة؟" قلتله عندك حق وأنا غلط، وكان الحوار هادي. وفجأة وأنا بسلم عليه علشان أمشي، ضربني بالبوكسات واللكمات في وشي كتير جدًا، ودم نزل مني، ووقعت على الأرض، وكمل يضربني وأنا واقع.

وتابع : حازم حاول يفصل وضربه بونية. في اللحظة دي خالي كان بيعدي الطريق وجاي لنا. وأنا قومت من على الأرض، وفجأة لقينا عربية سودة جاية علينا بسرعة كبيرة وجات تخبطنا. خبطتنا أنا وحازم وخالي أحمد ووقعنا على الأرض. المتهم مصطفى عصام الدين كان سايق العربية، وكان متربص علشان يخبطنا ويموتنا.

اتنقلت المستشفى بالإسعاف مع حازم وخالي. اتكشف علي في مستشفى زايد التخصصي وبعدين اتحولت لمستشفى نيو ستاليا. خالي اتحجز في الرعاية، وأنا كتبوا لي خروج بعد يومين، وطلبوا عملية في مناخيري بسبب الكسر. حازم عمل عملية شرائح ومسامير في رجله، والشرطة جم مستشفى زايد وخدوا أقوالي، وده كل اللي حصل.

 تأجيل أولى جلسات محاكمة الملاكم

وفي وقت سابق، قررت محكمة جنح الشيخ زايد، اليوم، تأجيل أولى جلسات محاكمة الملاكم المتهم بالتعدي على أسرة أمام مقر نادي “بيفرلي هيلز”، لجلسة 29 نوفمبر الجاري للحكم.

اقرأ أيضًا:

أول تعليق من كمبوند "بيفرلي هيلز" على حادث الدهس بالشيخ زايد

أول تعليق من مدرسة المتهمين في واقعة الدهس بالشيخ زايد

"حق حازم مش هيروح"، إحالة الملاكم المعتدي على أسرة أمام نادي بيفرلي هيلز للمحاكمة