المتهمة الأولى في مقتل اللواء اليمني: هددناه بتصويره عاريًا لو اتكلم

حصل “تليجراف مصر” على نص التحقيقات في قضية مقتل مسؤول يمني على يد 5 أشخاص في منطقة بولاق الدكرور.

وجاء في نص أقوال المتهمة الأولى ما يلي:

س- أنت متهمة وآخرون بسرقة المجني عليه حسن العبيدي وكان ذلك بطريق الإكراه الواقع عليه بأن قمتي مع المتهمة “إسراء. ص” بدس منوم له بمشروبه وما أن ظفرتم به حتى قمتم بالتعدي عليه بالضرب وتهديده بتصويره عاريًا؟

ج- أنا معملتش الحاجة دي إسراء هي اللي خططت لذلك.

س- وأين كانت تحتفظ المتهمة إسراء بذلك العقار المنوم؟

ج- هي كانت حطاه في كيس خاص علبة سجائر وحطاه في شنطتها وكانت بتطلع منه وتحط بيديها بالكباية وبعدين شلته في جيبها على طول.

س- وهل تناول ذلك الكأس آنذاك؟

ج-  أيوة هو شرب الكباية اللي حطينا فيها المنوم.

س- وهل بدأت آثار المنوم بالظهور على المجني عليه؟

ج- أيوة هو بدأ ينام.

س- وهل استكفيتم بذلك حتى تشرعوا في تنفيذ مخططكم؟

ج-  لا إحنا حطينا له منوم في كباية تانية.

س- وكيف ذلك؟

ج- هو صب لنفسه من زجاج الويسكي كباية وقام دخل الأوضة فقامت إسراء حطت من المنوم تاني في الكباية وقلبته بصباعها وإديتني الكيس.

س- وأين ذلك الكيس تحديدًا؟

ج- أنا دخلت الحمام وحطيته في جيب جاكت من الهدوم المتسخة الموجودة في الحمام.

س- وهل قامت المتهمة إسراء صابر بالنزول آنذاك لاصطحاب المتهمين رمضان وعبد الرحمن؟

ج- أيوة هي نزلت عشان تجيب رمضان وعبد الرحمن.

س- وما هي سبب قيامها بالنزول لإحضارهما وعدم استكمال المخطط المتفق عليه؟

ج- هو عشان رمضان مستعجل والراجل مكنش نام فهو طلع عشان يهدده بالمطواة ويكتفه ويسرقه بالمطواة اللي معاه.

س- وكيف علمتي بأن المتهم رمضان بحوزته سلاح أبيض؟

ج- هو رمضان على طوول بيمشي وشايل المطواة ديه معاه ولما طلع فتحاه.

س- وما هو وصف ذلك السلاح تحديدًا؟

ج- هي مطواة قرن غزال من اللي بتفتح دي.

س- وما هي كيفية قيام المتهمة إسراء بالنزول آنذاك؟

ج- هي قالت للراجل إنه هي عايزة تنزل تجيب حاجة من السوبر ماركت وأعطاها مفاتيح البيت ونزلت ساعتها عشان تجيب رمضان وعبد الرحمن وطلعت على طول مخدتش وقت.

س- وهل انطفأت مقاومة المجني عليه آنذاك؟

ج- لا هو استمر في الصريخ والنداء.

س- وما التصرف الذي بدر من المتهمين آنذاك؟

ج- هي إسراء قالت لعبد الرحمن مينفعش لازم نؤدبه ونفضحه وبعدها قلعوه البنطلون عشان نصوره ونفضحه لو مسكتش.

س- وهل قمتم بكشف عورة المجني عليه آنذاك؟

ج- أيوة هو عبد الرحمن قلعه البنطلون ومكنش لابس حاجة تحتيه.

س- وهل قامت المتهمة إسراء بتصوير المجني عليه آنذاك؟

 ج- هي مسكت الموبايل وعملت نفسها بتصور بس مصورتش حاجة.

س- وهل تقاسمتم نتيجة المسروقات فيما بينكم؟

ج- أيوة إحنا كل واحد فينا خد خمسة آلاف جنيه بعد خصم الألف جنيه بتاعت الشقة اللي هنأجرها لينا كلنا وقعدنا في بيت إسراء ورمضان ثلاث أيام تقريبا وروحنا.